Nizamiqızı H.

Qara Qarayev musiqisi belarusluları sehrlədi

Bildiyimiz kimi, bu il görkəmli bəstəkar, SSRİ xalq artisti, Dövlət mükafatı laureatı Qara Qarayevin 90 yaşı tamam olur. Musiqi mədəniyyəti tariximizdə özünəməxsus iz salmış bəstəkarın yubileyi ilə əlaqədar ölkə başçısı cənab İlham Əliyev tərəfindən müvafiq sərəncam da imzalanmışdır. Elə bu münasibətlə ölkəmizlə yanaşı onun hüdudlarından kənarda da silsilə anım tədbirləri, konsertlər təşkil olunur.

Bu qəbildən olan konsertlərdən biri də Belarusun paytaxtı Minskdə keçirilmişdir. Aprelin 8-də Belarus Dövlət Filarmoniyasında Belarus Dövlət Akademik Simfonik Orkestrinin müşayiəti ilə təntənəli yubiley konserti gerçəkləşmişdir. Bəstəkarın məşhur əsərlərinin ifa olunduğu konsertdə orkestrə Azərbaycanın xalq artisti, Dövlət mükafatı laureatı Rauf Abdullayev dirijorluq etmişdir.

Azərbaycanla Belarus arasındakı intensiv mədəni əməkdaşlığın təzahürü olan konsert barədə məlumat verən Mədəniyyət və Turizm Nazirliyi Mədəniyyət siyasəti şöbəsinin müdiri Fikrət Babayev səfər təəssüratlarını bizimlə bölüşdü: "Görkəmli bəstəkar Qara Qarayevin 90 illik yubileyi münasibətilə keçirilən bu konsert çox yüksək səviyyədə təşkil olunmuşdu. Konsert öncəsi Belarus Dövlət Filarmoniyasının foyesində bəstəkarın həyat və yaradıcılığını əks etdirən fotosərgi nümayiş olundu. Musiqi Mədəniyyəti Dövlət Muzeyinin təşkil etdiyi bu sərgi tamaşaçılar tərəfindən böyük maraqla qarşılandı. Bəstəkarın həyat məqamlarını, məşhur müəllimləri, tələbələri, dövlət xadimləri ilə olan tarixi görüşlərinin fotolardakı əksi tamaşaçılar tərəfindən maraqla izləndi".

Konsert öncəsi tamaşaçılar qarşısında ölkəmizin Belarusdakı səfiri Əli Nağıyev və Belarus Mədəniyyət nazirinin birinci müavini V.P. Rılatko çıxış edərək tədbirin əhəmiyyətindən, iki ölkə arasındakı mədəni əlaqələrin hazırkı səviyyəsindən və ümumilikdə Azərbaycan mədəniyyəti və incəsənətinin zənginliyindən danışmışlar. Natiqlər Azərbaycan musiqi xəzinəsində xüsusi yeri olan Qara Qarayev yaradığcılığının rəngarəngliyindən, özünəməxsusluğundan söz açmışlar.

"Konsertdən öncə musiqişünas Olqa Brilon Q. Qarayevin həyat və yaradıcılığına həsr olunmuş maraqlı məruzə ilə çıxış etdi. 15-20 dəqiqəlik məruzəsi müddətində bəstəkarın həyat məqamlarına aid maraqlı faktları diqqətə çatdıran xanım Brilon Qara Qarayev yaradıcılığının təkrarsızlığından danışaraq fikrini bəstəkarın əsərlərini qısa təhlillərlə əsaslandırdı. Bir çox tamaşaçıların ilk dəfə eşitdiyi bu faktlar maraqla dinlənildi.

Musiqişünasın çıxışı zamanı səhnədəki monitorda bəstəkara həsr olunmuş 4 dəqiqəlik səssiz film də nümayiş olundu.

Bayramsayağı bəzədilmiş filarmoniyanın böyük zalında yerli tamaşaçılarla yanaşı Azərbaycan dlasporunun, Belarusa akkreditə olunmuş səfirliklərin nümayəndələri də iştirak edirdi.

Rauf Abdullayevin dirijorluğu ilə baş tutan konsertdə Belarus Dövlət Akademik Simfonik Orkestrinin ifasında Qara Qarayevin "Leyli və Məcnun" simfonik poeması, “Don Kixot” baletindən simfonik qravürlər və "İldırımlı yollarla" baletindən suita təqdim olundu".

Konsertin çox maraqlı alındığını deyən müsahibim Dövlət Simfonik Orkestri ilə cəmi 4-5 gün məşq edən Rauf Abdullayevin yüksək peşəkarlıq nümayiş etdirərək orkestrlə yaxşı dil tapdığını də əlavə edi: "Qısa vaxt ərzində orkestrlə özünəməxsus ünsiyyət yaratmağa müvəffəq olan Rauf müəllimin əməyini xüsusilə qeyd etmək istərdim. Bunu təkcə mən yox, konsertdə iştirak edən musiqiçilər, bəstəkarlar dönə-dönə vurğuladılar. Təbii ki, bu da dirijorun yüksək peşəkarlığının təzahürü idi, Və təbii ki, bütün bu kimi detallar ümumilikdə konsertin yüksək səviyyədə keçməsinə zəmin yaratdı və nəticədə ecazkar Azərbaycan musiqisinin təsiri belaruslu musiqisevərləri bir daha valeh etdi. Ümumiyyətlə, qeyd edim ki, tədbirin təşkilati işlərində Belarusun Mədəniyyət Nazirliyi, filarmoniyanın rəhbərliyi bizə böyük kömək göstərdilər, bütün xahişlərimizi nəzərə aldılar. Səhnənin tərtibatından tutmuş dəvətnamələrin hazırlanmasınadək hər şey yüksək səviyyədə təşkil olunmuşdu. Tamaşaçı münasibəti isə öz yerində. Deyim ki, belaruslular mədəniyyətə, musiqiyə, sənətə meyillidirlər. Təsəvvür edin ki, onların filarmoniyası fasiləsiz olaraq həftənin yeddi günü işləyir. Özü də bütün konsertlər anşlaqla keçir. Konsert zamanı biz də bunun şahidi olduq".

Belarusla Azərbaycan arasında mədəni əlaqələrin daha da intensiv hal aldığını və tədbirin də bu əlaqələr çərçivəsində gerçəkləşdiyini deyən Fikrət müəllim bu ilin payız aylarında Bakıda Belarus Mədəniyyəti Günlərinin keçiriləcəyini də vurğuladı: "Səfər çərçivəsində fürsətdən istifadə edib Belarusun Milli Kitabxanasında və Dövlət İncəsənət Muzeyində də oldum. Bu müəssisələrin rəhbərləri ilə fikir mübadiləsi apardıq. Hesab edirəm ki, gələcəkdə istər bu muzey, istərsə də kitabxana ilə yaxşı əməkdaşlıq əlaqələri quracağıq.

Minskdə olarkən Belarusun Akademik Opera və Balet Teatrının rəhbəri, həmyerlimiz Valentin Nikolayeviç Elizarevlə də görüşdüm. Əslən Bakıdan olan bu insan Belarusda çox tanınmış balet mütəxəşsisidir, SSRİ və Belarus xalq artisti, Dövlət mükafatı laureatı, professordur. Balet sahəsində çox böyük mütəxəssis olan həmyerlimiz Türkiyə və bir sıra Avrora ölkələrinin opera səhnələrində maraqlı balet tamaşaları qurub. Bakıda doğulan, 20 saylı orta məktəbdə təhsil alan Elizarev sonradan ali təhsilini Leninqradda (Sankt Peterburq) davam etdirib və o vaxtdan Bakıya gəlməyib. 40 il ərzində hələ də Azərbaycan dilini unutmayan sənətkar bu ilin iyununda Heydər Əliyev Fondunun dəvəti ilə Azərbaycana gələcək".

Mədəniyyət.- 2008.- 17 aprel.- S. 5.