Azərbaycan mədəniyyətinə ağır
itki üz vermişdir. Görkəmli
bəstəkar, əməkdar
incəsənət xadimi,
xalq artisti, Azərbaycan Respublikası
Prezidentinin fərdi təqaüdçüsü, professor
Ramiz Hacı oğlu Mustafayev 2008-ci il aprel ayının
10-da ömrünün 82-ci ilində vəfat etmişdir.
Ramiz Mustafayev 1926-cı il oktyabrın
16-da Türkmənistanın Çərcou şəhərində
anadan olmuşdur. Bir il sonra ailəsi
ilə birlikdə Bakıya köçən
Ramiz Mustafayev 1940-cı ildə natamam orta təhsilini
başa vuraraq,
1941-1943-cü illərdə Azərbaycan Dövlət Teatr Məktəbinin aktyorluq şöbəsində,
1948-1953-cü illərdə Azərbaycan Dövlət Konservatoriyasında vokal,
1953 – 1957-ci illərdə isə
bəstəkarlıq ixtisasları
üzrə ali təhsil almışdır.
Əmək fəaliyyətinə
1942-ci ildə Gənc
Tamaşaçılar Teatrında
artist kimi başlayan Ramiz Mustafayev 1943 – 1948-ci illərdə
Azərbaycan Dövlət
Dram Teatrının aktyoru olmuş, 1948-ci ildən ömrünün
sonunadək indiki “Azərbaycan Televiziya və Radio Verilişləri”
Qapalı Səhmdar
Cəmiyyətinin xor kollektivində xormeyster, baş redaktor və bədii rəhbər vəzifələrində
çalışmışdır. O,
1968-1973-cü illərdə Azərbaycan Bəstəkarlar
İttifaqının katibi
olmuşdur.
Ramiz Mustafayev Azərbaycan bəstəkarlıq
məktəbinin ənənələrini
layiqincə davam etdirən və musiqi mədəniyyətimiz
tarixində öz dəst-xətti ilə seçilən sənətkarlardan olmuşdur.
Bəstəkarın ümumən
xalq sənətinin tükənməz xəzinəsindən
qidalanan yaradıcılığına
məzmun dolğunluğu
və forma rəngarəngliyi xasdır.
Vətən sevgisinin tərənnümü onun
altmış ildən
artıq bir dövr ərzində aktual mövzularla zəngin və çoxşaxəli fəaliyyətinin
başlıca qayəsini
təşkil etmişdir.
Sənətkarın tarixi
keçmişimizə dərin
maraq oyadan “Vaqif” operası Azərbaycan Dövlət Opera və Balet
Teatrında uğurlu səhnə həyatı yaşamışdır.
Ramiz Mustafayevin əsərləri – opera və musiqili komediyaları, oratoriya və kantataları, vokal-simfonik poemaları, simfonik və kamera musiqiləri, marş, mahnı və romansları müasir musiqi mədəniyyətimizin nailiyyətləri
sırasındadır. Fitri
istedadın məhsulu
olan bu sənət
nümunələri həmişə
rəğbət və
məhəbbətlə qarşılanmış,
ölkəmizin hüdudlarından
uzaqlarda da müvəffəqiyyətlə ifa edilərək, müəllifinə şöhrət
gətirmişdir. Bəstəkarın
vokal əsərləri
unudulmaz ifaçılarımızın
repertuarında səslənərək
populyarlıq qazanmışdır.
Ramiz Mustafayev uzun illər Azərbaycan Televiziyası
və Radiosu xorunun rəhbəri olaraq, ölkəmizdə bu musiqi janrının
inkişafı yolunda böyük əmək sərf etmişdir. O, xor üçün neçə-neçə
yaddaqalan əsər bəstələmiş, 250-yə
yaxın xalq mahnısını və təsnifi işləmişdir.
Professional musiqi sənətimizin görkəmli
nümayəndələrindən olan bəstəkar həm də tanınmış dirijor idi.
Ramiz Mustafayevin respublikamızda musiqi kadrlarının yetişdirilməsi
sahəsində səmərəli
pedaqoji fəaliyyəti
də təqdirəlayiqdir.
O, ayrı-ayrı illərdə Bakı Musiqi Akademiyasının və Azərbaycan Milli Konservatoriyasının
professoru kimi gənc musiqiçilər
nəslinin yetişdirilməsində
özünün bilik
və təcrübəsini
əsirgəməmişdir.
Ramiz Mustafayev milli musiqi mədəniyyətinin
inkişafındakı xidmətlərinə
görə ölkəmizin
ali mükafatlarından
olan “Şöhrət”
ordeni ilə təltif edilmişdir.
Görkəmli bəstəkar,
qayğıkeş pedaqoq
və səmimi insan Ramiz Hacı
oğlu Mustafayevin əziz xatirəsi onu tanıyanların qəlbində daim yaşayacaqdır.
Allah rəhmət eləsin!
İlham Əliyev, Artur Rasizadə, Oqtay Əsədov, Ramiz Mehdiyev, Elçin Əfəndiyev,
Hacıbala Abutalıbov,
Fatma Abdullazadə, Əbülfəs Qarayev, Arif Alışanov, Firəngiz Əlizadə, Fərhad Bədəlbəyli,
Siyavuş Kərimi, Arif Məlikov, Aqşin Əlizadə, Azər Rzayev, Tofiq Bakıxanov, Nəriman Məmmədov, Oqtay Zülfüqarov, Ramiz Mirişli
Xalq qəzeti.- 2008.- 11 aprel.- S. 2.