Təranə

Akademik Milli Dram Teatrı Kazandan qayıdıb

Mədəniyyət və Turizm Nazirliyi ilə Tatarıstan Respublikası Mədəniyyət Nazirliyi arasında imzalanan mədəni əməkdaşlıq üzrə Tədbirlər Planına əsasən, Akademik Milli Dram Teatrı Kazanda qastrol səfərində olub. Aprel ayının 16-dan 22-dək davam edən səfərdə teatrın direktoru Maqbet Bünyatovun rəhbərliyi ilə 40 nəfərlik heyət iştirak edib. Teatrın mətbuat xidmətindən verilən məlumatda bildirilir ki, Tatarıstan tamaşaçılarına Bəhram Osmanovun quruluşunda Elçinin "Arılar arasında" və Əli Əmirlinin "Mesenat" tamaşaları nümayiş etdirilib. Baş rolları Xalq artistləri Nurəddin Mehdixanlı, Şükufə Yusupova, Firəngiz Mütəllimova, İlham Əsgərov, Əməkdar artistlər Cəfər Namiq Kamal, Kazım Abdullayev, Elxan Quliyev və b. ifa ediblər. Hər iki tamaşa böyük rəğbətlə qarşılanıb. Kollektivlə görüş zamanı baş nazirin müavini və mədəniyyət naziri Z.Valeyeva, eləcə də Tatarıstan prezidentinin beynəlxalq məsələlər üzrə dövlət müşaviri T.Akulov, Ümumdünya Tatar Konqresinin sədri R.Zakirov öz təşəkkür məktublarında bu qastrol səfərini iki qardaş ölkə arasındakı mədəni əlaqələrin inkişafında olan mühüm addım kimi dəyərləndiriblər. Milli Teatr fəxri fərman və dəyərli mükafatlarla təltif olunub.

Bundan əlavə, Q.Kamal adına Tatar Akademik Teatrı ilə Akademik Milli Dram Teatrımız arasında qarşılıqlı əməkdaşlıq barədə danışıqlar aparılıb.

Kaspi.- 2008.- 24 aprel.- S. 15.