Rəsul G.

Belarus sənətsevərləri Azərbaycan incəsənətini yüksək qiymətləndirdilər

Azərbaycan Dövlət Gənc Tamaşaçılar Teatrının kollektivinin Minskə qastrol səfəri başa çatıb.

Teatrın direktoru, əməkdar artist Mübariz Həmidovun sözlərinə görə, qeyri-adi bir anşlaqla keçən “Pişiyin evi” və “Ana qaz” tamaşaları çox böyük tamaşaçı məhəbbəti ilə qarşılanıb: “Aktyorlarımız dəfələrlə təzim etmək üçün səhnəyə qaytarıldılar. Bu, Belarus sənətsevərlərinin Azərbaycan incəsənətinə verdikləri yüksək qiymət idi. Onu da deyim ki, tamaşaların çox böyük müvəffəqiyyətlə oynanılması və tamaşaçı reaksiyasının yüksək səviyyədə olması barədə Belarusun, demək olar ki, bütün kütləvi informasiya vasitələrində materiallar dərc olundu”. Onun sözlərinə görə, Azərbaycan və Belarus Dövlət Gənc Tamaşaçılar Teatrı direktorları arasında aparılan danışıqlar nəticəsində beynəlxalq qastrol mübadiləsinə dair ikitərəfli müqaviləyə əsasən, baş tutan qastrolun açılış mərasimində ölkəmizin Belarusdakı fövqəladə və səlahiyyətli səfiri Əli Nağıyev, eləcə də Belarus Azərbaycan Konqresinin prezidenti Natiq Bağırov da iştirak ediblər. Tədbirdə çıxış edənlər Azərbaycanla Belarus mədəniyyət nazirlikləri arasında bağlanmış müqavilənin iki ölkə teatrları arasında dostluq münasibətlərinin və yaradıcılıq əlaqələrinin genişlənməsinə təkan verdiyini vurğulayıblar. Qeyd edək ki, Dövlət Gənc Tamaşaçılar Teatrının səfəri hər iki teatrın direktorları arasında beynəlxalq qastrol mübadiləsinə dair imzalanmış ikitərəfli müqaviləyə əsasən həyata keçirilib.
Səfər çərçivəsində noyabrda Belarus Dövlət Gənc Tamaşaçılar Teatrının kollektivinin Azərbaycan Dövlət Gənc Tamaşaçılar Teatrının səhnəsində çıxış etməsi barədə razılıq əldə olunub. Qonaqlar Gənc Tamaşaçılar Teatrının əsaslı təmirdən çıxmış binasında iki tamaşa təqdim edəcəklər. Teatr rəhbərinin sözlərinə görə, səfərdə Belarus Dövlət Gənc Tamaşaçılar Teatrının baş rejissoru Başeva Nataliya Oleqovna yerli teatra dəvət olunub. Belə ki, N. Oleqovna Azərbaycan Dövlət Gənc Tamaşaçılar Teatrının əsaslı təmiri başa çatdıqdan sonra Bakıya səfər edəcək və teatrda uşaqlar üçün tamaşa hazırlayacaq.

Zaman.- 2008.- 10-11 aprel.- S. 9.