Taşdemir T.

Araz sahilində doğan günəş

Vasif Talıbov səhnə arxasında yaradıcı kollektivlə görüşüb və bu səhnə əsəri ilə bağlı təəssüratlarını onlarla bölüşüb.

Cəlil Məmmədquluzadə adına Naxçıvan Dövlət Musiqili Dram Teatrında Həsənəli Eyvazlının “Araz sahilində doğan günəş” əsəri əsasında hazırlanan eyniadlı tamaşaya ictimai baxış keçirilib. Naxçıvan Muxtar Respublikası Ali Məclisinin Sədri Vasif Talıbov və Türkiyə Respublikasının Naxçıvan Muxtar Respublikasındakı Baş konsulu Mehmet Bilir də bu tamaşanı izləyənlər arasında olublar.
Tarixi mövzuda qələmə alınmış “Araz sahilində doğan günəş”də XX əsrin əvvəllərində Azərbaycanda gedən siyasi proseslər əksini tapıb. Belə ki, Azərbaycan Respublikasının xalq artisti Kamran Quliyevin quruluş verdiyi tamaşada həmin dövrdə Naxçıvanın taleyi ilə bağlı ciddi narahatçılıq keçirən Mustafa Kamal Atatürk, Behbud ağa Şahtaxtinski, İbrahim Əbilov, Nəriman Nərimanov kimi tarixi şəxsiyyətlərin bu bölgənin statusunun müəyyənləşdirilməsi sahəsindəki fəaliyyətləri diqqət mərkəzindədir. Tamaşada ermənilərin torpaq iddiaları, Stalin və Çiçerinin onlara havadarlıq etmələri real tarixi faktlar əsasında tamaşaçılara çatdırılır. Tamaşada 1921-ci ildə Türkiyənin Azərbaycana gösdərdiyi dostluq, qardaşlıq köməyi, Naxçıvan məsələsində heç bir güzəştə getməməsi də təbii şəkildə canlandırılıb. 
Tamaşadan sonra Naxçıvan MR Ali Məclisinin Sədri Vasif Talıbov səhnə arxasında yaradıcı kollektivlə görüşüb və bu səhnə əsəri ilə bağlı təəssüratlarını onlarla bölüşüb: “Araz sahilində doğan günəş” Naxçıvan teatrının səhnələşdirdiyi uğurlu tamaşalardan biridir. Tarixi mövzuda olan tamaşa bu günümüz üçün də aktualdır”. Qeyd edək ki,”Araz sahilində doğan günəş” tamaşasında əsas rollarda Azərbaycan Respublikasının xalq artisti Həsən Ağasoy, Azərbaycan Respublikasının əməkdar artistləri - Xəlil Hüseynov, Rza Xudiyev, Naxçıvan Muxtar respublikasının əməkdar artisti Əli Əliyev və digər aktyorlar çıxış ediblər.

Zaman.- 2008.- 17-18 aprel.- S. 9.