Hacızadə A.
Sankt-Peterburqda
Azərbaycan xalqının ümummilli lideri Heydər
Əliyevin 85 illik yubileyi ilə əlaqədar tədbirlər
çərçivəsində tanınmış
Azərbaycan yazıçısı və publisisti, Milli
Məclisin deputatı Elmira Axundovanın “Heydər Əliyev.
Şəxsiyyət və Zaman” kitabının ilk
təqdimatı böyük uğurla keçmişdir.
Mərasimi MDB Parlamentlərarası Assambleyasının
Katibliyi və Saltıkov-Şedrin adına Rusiya Milli
Kitabxanası təşkil etmişlər. Bu tədbir
MDB-də və uzaq xarici ölkələrdə dahi lider
Heydər Əliyevin yubileyinə həsr olunmuş
irimiqyaslı aksiyalar silsiləsindən birincisi idi.
“Heydər Əliyev. Şəxsiyyət və Zaman”
çoxcildli roman-tədqiqatı həm də müəllifin
şəxsi təəssüratlarına və
baxışlarına əsaslanan faktoloji, politoloji, tarixi
əsərdir. Kitab geniş oxucu kütləsinə məlum
olmayan faktlar, epizodlar, dərin təhlil və müəllif
şərhləri ilə müşayiət olunan məxsusi
informasiya ilə zəngindir. Yazıçının dahi
liderlə şəxsi tanışlığı romana
xüsusi emosionallıq və səmimilik verir.
Elmira Axundovanın kitabı polifonikdir, əsərdə
əsas qəhrəmanın - Heydər Əliyevin obrazı
ilə yanaşı, SSRİ-nin və Sovet
Azərbaycanının tanınmış xadimlərinin
portretləri də yer almışdır.
Rusiya Milli Kitabxanasının baş direktoru Vladimir Zaytsev
təqdimat mərasimini açaraq bildirmişdir ki, E.
Axundovanın kitabı Rusiyada böyük maraqla
qarşılanacaqdır, çünki Heydər Əliyevin
təkrarolunmaz və çoxşaxəli taleyi
aktuallığını heç zaman
itirməyəcəkdir. Rusiyada bu görkəmli insana daim
hörmət və ehtiram bəslənilmişdir.
Müəllifi olduğu əsəri haqqında
danışarkən Elmira Axundova vurğulamışdır ki,
tale ona XX əsrin ən parlaq siyasətçilərindən
biri olan bu dahi şəxsiyyətlə ünsiyyətdə
olmaq xoşbəxtliyini nəsib etmişdir. O,
xalqımızın ümummilli liderini “siyasət nəhəngi”
adlandırmış Rusiya Prezidenti V.Putinin sözlərini
xatırlatmışdır. Müəllif demişdir:
“Heydər Əliyev zamanın və taleyin daim ehtiyac
duyduğu, tarixin yeni mərhələsində, yeni siyasi
və sosial-iqtisadi şəraitdə təbiətin ona
bəxş etdiyi böyük liderlik potensialını
həyata keçirməyə nail olmuş bir insan idi. XX
əsrdə bu, bəlkə də heç kimə nəsib
olmamışdı”. E.Axundova dahi şəxsiyyətin
həyatının əsas məqamlarından danışaraq
vurğulamışdır ki, kitabın növbəti cildi
“Kreml beşilliyi” adlanacaqdır. Ümumilikdə bu irimiqyaslı
sənədli roman-tədqiqat 6 cilddən ibarət
olacaqdır.
MDB Parlamentlərarası Assambleyası Şurası baş
katibinin müavini, Milli Məclisin MDB PAŞ-dakı
nümayəndəsi Aydın Cəfərov bildirmişdir ki,
Azərbaycan xalqının ümummilli lideri haqqında
kitabın təqdimat mərasiminin Sankt-Peterburqda
keçirilməsi rəmzi məna daşıyır,
çünki onun taleyi Rusiyanın şimal paytaxtı ilə
sıx bağlı idi, burada onun xatirəsi daim ehtiramla
anılır. O, görüş iştirakçılarına
Heydər Əliyevin Azərbaycanın müasir tarixindəki
rolundan, habelə Elmira Axundovanın yaradıcılıq
fəaliyyətindən danışmışdır. Xüsusi
vurğulanmışdır ki, Azərbaycan Prezidenti İlham
Əliyev ümummilli lider Heydər Əliyevin siyasi xəttini
uğurla davam etdirir, inkişaf xətti yeridir. A.
Cəfərov demişdir: “Heydər Əliyevin Azərbaycanda
1993-cü ildən həyata keçirdiyi siyasət davam
etdiriləcəkdir. Bu, ölkəmiz üçün
çox vacibdir, keçmişdə çox
çətinliklər, o cümlədən qeyri-sabitlik,
vətəndaş müharibəsi, iqtisadi böhranla
üzləşmişdik. Bütün bunları geridə
qoymaq üçün xeyli vaxt və səy tələb
olunurdu. Buna görə də əsas məqsədimiz sabitliyi
və Heydər Əliyev xəttini qoruyub saxlamaqdır”.
Azərbaycanın Sankt-Peterburqdakı baş konsulu Qüdsi
Osmanov ölkəmizdə dövlətçiliyin
yaranmasında, Sankt-Peterburqda çoxsaylı və nüfuzlu
Azərbaycan diasporunun birləşməsində Heydər
Əliyevin rolundan danışmışdır. O
vurğulamışdır ki, Azərbaycanda çox
rəhbərlər olmuşdur, ancaq yalnız Heydər
Əliyev öz dühası və böyük siyasi
istedadı sayəsində milli lider ola bildi. Sankt-Peterburqda
azərbaycanlıların milli-mədəni muxtariyyətinin
sədri Vaqif Məmişov bildirmişdir ki, dahi lider Heydər
Əliyev haqqında kitabın təqdimatının
Sankt-Peterburqda keçirilməsi Azərbaycan diasporunun
nümayəndələri üçün əlamətdar
hadisədir. İndi təkcə soydaşlarımız deyil,
Rusiya oxucusu da görkəmli siyasi xadimin həyat və
fəaliyyəti barədə daha ətraflı məlumat ala
biləcəklər.
Rusiyalı qonaqların
- RF Yazıçılar İttifaqının Sankt-Peterburq
bölməsinin sədri Boris Orlov, şairə Liliya
Nəsibulina, MDB PA-nın ekspert-təhlil idarəsinin rəis
müavini Konstantin Pşenko və başqalarının
çıxışları da çox maraqlı və
məzmunlu idi. Çıxış edənlər E.
Axundovanın kitabını keçmiş sovet
məkanında tarixi publisistika sahəsində yenilik və
Rusiyanın şimal paytaxtının mədəni
həyatında böyük hadisə kimi
dəyərləndirdilər.
Tədbirdə iştirak edən Sankt-Peterburq Qanunvericilik
Məclisinin nümayəndələri, tanınmış
yazıçılar, şairlər, universitetlərin
rektorları, ədəbi-bədii nəşrlərin
rəhbərləri, şərqşünas alimlər, iri
sahibkarlar, aparıcı ali məktəblərin
tələbələri və aspirantları kitabın
müəllifi Elmira Axundovaya və tədbirin
təşkilatçılarına təşəkkür
edərək romanın növbəti cildlərini
gözlədiklərini bildirdilər.
Xalq qəzeti.- 2008.- 2 aprel.- S. 3.