Aprelin 2-də Milli
Məclisin sədri Oqtay Əsədov Azərbaycanda
səfərdə olan Estoniya parlamenti sədrinin müavini
Kristina Oyulandla görüşmüşdür.
O.Əsədov demişdir ki, Azərbaycan ilə Estoniya
arasında əlaqələr təkcə siyasi
müstəvidə deyil, iqtisadi və mədəni
sahələrdə də uğurla inkişaf edir. Bu
işdə qarşılıqlı səfərlərin
səmərəsindən danışan Milli Məclisin
sədri özünün Estoniyaya, eləcə də bu
yaxınlarda Estoniya iş adamlarının Azərbaycana
səfərini xatırladaraq aparılan
danışıqların bütün sahələrdə
əlaqələrin inkişafına yaxşı töhfə
verdiyini vurğulamışdır. O.Əsədov
parlamentlərarası münasibətlərin
dərinləşməsində dostluq qruplarının da
rolunu xüsusi qeyd etmişdir.
Parlamentin sədri Estoniyada Azərbaycan diasporuna
göstərilən diqqət və qayğıya görə
minnətdarlığını bildirmişdir.
Azərbaycana səfərindən məmnun qalan Kristina Oyuland
ölkələrimiz arasında əlaqələrin bundan sonra
daha da inkişaf edəcəyinə əminliyini
vurğulamış, Estoniyanın Azərbaycan ilə
münasibətlərin dərinləşməsində
maraqlı olduğunu bildirmişdir. Vitse-spiker Estoniya iş
adamlarının sürətlə inkişaf edən
Azərbaycana maraq göstərdiklərini demişdir. O,
parlamentlərarası əməkdaşlığın
əlaqələrin inkişafına yaxşı töhfə
verdiyini vurğulamışdır.
Daha sonra görüşdə qarşılıqlı maraq
doğuran digər məsələlər ətrafında fikir
mübadiləsi aparılmışdır.
Xalq qəzeti.- 2008.- 3 aprel.- S. 2.