Soyqırımı ilə bağlı sərgi açılmışdır

Martın 31-də Azərbaycan İstiqlal Muzeyində 31 Mart - Azərbaycanlıların Soyqırımı Günü ilə əlaqədar "Qan yaddaşı" adlı sərgi açılmışdır.
Sərgidə muzeyin fondunda qorunub saxlanılan sənədlər və fotoşəkillər nümayiş etdirilir. Şəkillərdə Bakıda, Şuşada, Şamaxıda, Gəncədə, Tuğ kəndində 1905-1918-ci illərdə ermənilər tərəfindən dağıdılmış yaşayış məskənləri, evləri əks olunmuşdur.
Açılış mərasimində muzeyin direktoru Fəridə Şəmsi, AMEA Tarix İnstitutunun Qarabağ bölməsinin müdiri Qasım Hacıyev və başqa natiqlər bildirmişlər ki, Rusiyada 1917-ci il oktyabr çevrilişindən sonra özlərini Qafqazda bolşevik hakimiyyətinin dayağı hesab edən ermənilər sovet hakimiyyəti qurmaq adı altında Bakıda hakimiyyəti ələ keçirmişdilər. 1918-ci il martın 30-dan aprelin 1-dək onlar bolşevik Rusiyasının hərbi yardımı ilə Bakıda soyqırımı törədərək 15 min azərbaycanlını qətlə yetirmişlər. Məqsəd Bakını ələ keçirib, onun neftinə sahib çıxmaq idi.
Bildirilmişdir ki, həmin il mart-may aylarında ermənilər Şamaxıda, Qubada, Xaçmazda, Ağsuda, Kürdəmirdə, Salyanda, Lənkəranda kütləvi qırğınlar törətmiş, 50 mindən artıq soydaşımızı qəddarüsullarla qətlə yetirmişlər. Qırğınlar İrəvan quberniyası ərazisində, Qarabağda, Zəngəzurda, Naxçıvanda, Qars vilayətində daha amansız şəkildə törədilmişdi. Şamaxı qəzasında 58, Quba qəzasında 112, Gəncə quberniyasında 272 (o cümlədən Zəngəzurda 115, Qarabağda 157), İrəvan quberniyasında 211, Qars vilayətində 82 yaşayış məntəqəsi yerlə-yeksan edilmiş, yüz minlərlə azərbaycanlı qətlə yetirilmiş, bir milyona yaxın əhali öz tarixi-etnik torpaqlarından didərgin salınmışdı.
Tədbirdə Qarabağ Müharibəsi Veteran Qadınlar Birliyinin üzvləri, Qafqaz Universitetinin tələbələri, Bakı Özəl Türk liseyinin şagirdləri, Azərbaycan Sərhəd Qoşunları Sahil Mühafizəsinin zabit, miçman və matrosları iştirak etmişlər.
Qafqaz Universitetinin tələbələri ekspozisiya göstərmiş, Dövlət Rəssamlıq Akademiyasının I kurs tələbələrinin əl işləri nümayiş etdirilmişdir.

Azərbaycan.-2008.- 1 aprel.- S. 5.