Nəzakət

 

Tarix və mədəniyyət abidələrinin siyahısı hazırlanıb

 

Mədəniyyət və Turizm Nazirliyinin mətbuat xidmətindən SİA-ya verilən məlumata görə, Prezident İlham Əliyevin Sərəncamına əsasən, Mədəniyyət və Turizm Nazirliyində ölkə ərazisində yerləşən dövlət mühafizəsinə götürülməsi təklif olunan daşınmaz tarix və mədəniyyət abidələrinin siyahısının ilkin variantı hazırlanmışdır. Hazırlanmış siyahı irad və təkliflərin bildirilməsi üçün müvafiq təşkilat və qurumlara göndərilmişdir.

Siyahının ilkin variantında dünya əhəmiyyətli abidələr siyahısına YUNESKO-nun Dünya İrsi Siyahısına qəbul edilmiş abidələrimiz (İçərişəhər, Şirvanşahlar sarayı kompleksi, Qız qalası, Qobustan qoruğu) daxil edilmişdir. İllər boyunca təbii fəlakət və digər səbəblərdən itirilmiş abidələr siyahıdan çıxarılmış və ölkəmizin müxtəlif bölgələrində yeni aşkar olunmuş abidələrlə zənginləşmişdir. Yeni aşkar olunmuş abidələrdən Ağstafa rayonunun ərazisində yerləşən, ölkə başçısının Sərəncamı ilə qoruq elan edilmiş Keşikçidağ mağaralar kompleksini, Göygöl, Gədəbəy, Şəmkir, Qəbələ, Balakən, Lənkəran və digər rayonların ərazilərində yerləşən dini, xatirə, hidrotexniki, müdafiə tikililərini və yaşayış evlərini göstərmək olar. Nazirlikdə hazırlanan siyahının ilkin variantında 7 minə yaxın abidənin dövlət mühafizəsinə götürülməsi təklif olunur. Respublika ərazisində dövlət mühafizəsinə götürülmüş daşınmaz tarix və mədəniyyət abidələrinin siyahısı ilk dəfə 1968-ci ildə hazırlanmışdır. Yeni hazırlanmış siyahıya tövsiyə, təklif və iradların bildirilməsi üçün müxtəlif qurum, təşkilat, müstəqil alim və tədqiqatçılar ilə müzakirələrin keçirilməsi də nəzərdə tutulur.

 

Səs.- 2008.- 7 avqust.- S. 14.