Vahidoğlu O.

Turizmin inkişafı Azərbaycan üçün prioritetdir

İlham Əliyev: Azərbaycanda turizm dünya səviyyəsində olmalıdır ki, bizim insanlar bundan istifadə etsinlər və xaricdən də turistlər daha çox gəlsinlər

Gəlirlilik göstəricilərinə əsasən, turizm artıq XXI əsrin əsas sahələrindən biri hesab edilir. İldən-ilə bu sektorda inkişaf tempinin sürətlənəcəyini bəyan edən Ümumdünya Turizm Təşkilatı beynəlxalq turizmdən gələn gəlirlərin hər il 4 faiz artacağını proqnozlaşdırır. Təşkilat ekspertlərinin proqnozlarına inansaq, 2020-ci ilə qədər dünya üzrə səyahətlərin sayı 3 dəfə artacaq.

Mütəxəssislərin fikrincə, Azərbaycanda müxtəlif iqlim qurşaqları və gözəl təbiət var. İqtisadi inkişaf, infrastrukturun yaradılması istiqamətində aparılan işlər isə ölkəmizin turistlərin görmək istədiyi səviyyəyə çatmasına geniş imkanlar yaradır.

Turizm mövsümünün başlaması ilə əlaqədar ölkədə artıq 238 turizm şirkəti sifariş qəbul edir. Ölkəmizə maraq artdığından hər il turistlərin sayında əsaslı artım hiss olunur. Belə ki, əgər ötən il Azərbaycana 900 min turist istirahətə gəlmişdirsə, bu il həmin göstəricinin 1 milyonu ötəcəyi proqnozlaşdırılıb. Ümumiyyətlə, 2002-ci illə müqayisədə iki dəfə artım müşahidə edilib.

2008-ci ilin ilk yarısının sosial-iqtisadi inkişafına dair müşavirədə Prezident İlham Əliyev bildirmişdir ki, 2009-cu ildə xüsusilə turizm imkanlarının genişlənməsinə diqqət göstəriləcək. Bu il həmin məqsədlər üçün çox böyük vəsait ayrılıbdır. Azərbaycanda yeni turizm zonaları müəyyən edilibdir. Əgər hər şey plan üzrə getsə, 1-2 ildən sonra Azərbaycanda beynəlxalq səviyyəyə cavab verən qış turizm mərkəzi yaradılacaqdır. Burada da mexanizm çox sadədir. Dövlət bütün infrastruktur layihələrini öz üzərinə götürür - yol, elektrik stansiyaları, elektrik xətləri, qazpaylayıcı şəbəkələr, su xətləri. Qalan işləri də özəl firmalar etməlidir. Əgər özəl firmaların işə başlaması üçün dövlət dəstəyi lazım olacaqsa, dövlət bunu da etməyə hazırdır.

Turizmin inkişafı Azərbaycan üçün prioritetdir. Əhalinin artan tələbatını nəzərə alaraq yaxın vaxtlarda Azərbaycanda iri turizm obyektlərinin yaradılmasına başlanacağı da istisna edilmir. Azərbaycanda turizmin inkişafı ilə əlaqədar hazırlanan və 2007-2016-cı illəri əhatə edəcək Dövlət Proqramı çərçivəsində daha bir neçə bölgədə yeni turizm mərkəzlərinin yaradılması nəzərdə tutulub. Bu ilin altı ayında ölkənin 48 şəhər və rayonu üzrə 327 sahibkarlıq subyektinin investisiya layihələrinin maliyyələşdirilməsinə 40,7 milyon manat məbləğində güzəştli kreditlər verilmişdir. Bu kreditlərin müəyyən hissəsindən turizm sektorunda fəaliyyətini genişləndirmək istəyən sahibkarlar yararlanıblar.

Turizm ölkəmizin iqtisadi inkişafı üçün prioritet hesab edilir. Hökumət tərəfindən bölgələrdə fəaliyyət göstərən turizm şirkətlərinə müəyyən güzəştlərin tətbiqi, xarici sərmayələrin bu istiqamətə yönəldilməsi müsbət nəticə verə bilər.

Ölkə prezidenti bəyan etmişdir ki, bir müddət bundan əvvəl Naftalan Dövlət Kurort Mərkəzinin yaradılması üçün lazımi qərarlar qəbul edilib, ilkin vəsait ayrılıb, indi təhlil-qiymətləndirmə işləri aparılır. Dünyada nadir müalicəvi xüsusiyyətlərə malik olan Naftalan neftindən səmərəli istifadə etmək üçün dövlət tərəfindən bütün lazımi tədbirlər görülür. Beləliklə, həm özəl sektorun inkişafı, insanların istirahəti və Azərbaycanı turizm ölkəsinə çevirmək üçün yaxşı şərait yaradılacaqdır.
Xarici investisiyaların ölkəyə cəlb olunması haqqında, regionların sosial-iqtisadi inkişafına dair Dövlət Proqramı və digər vacib hüquqi sənədlər qüvvəyə mindikdən sonra başqa sahələr kimi, turizmin də sürətli inkişafı üçün əlverişli şərait yaranıb. Bununla əlaqədar xarici investorları yerli bazara cəlb etmək mümkün olub. Turizm sahəsində maraqlı layihələr həyata keçirilir. Azərbaycanın turizm bazarında xarici iş adamları daha fəal iştirak edirlər. Onların fəaliyyətinin nəticəsi kimi yerli və ya xarici kapitalla şərikli müasir turizm obyektlərinin tikilməsini misal göstərmək olar. Otel biznesindən gələn gəlir hesabına büdcəyə köçürmələr də artır.
Turizm sektorunun inkişafı respublika rəhbərliyi tərəfindən iqtisadiyyatın öncül istiqamətlərindən biri kimi müəyyənləşdirilmişdir. Sahənin hərtərəfli inkişafı, ölkəmizin turizm imicinin yüksəldilməsi məqsədilə yaraşıqlı istirahət obyektləri ucaldılır, bölgələrdə infrastruktur təkmilləşdirilir. Hazırda ölkəmizdə çoxlu sayda hotel inşa olunur. Azərbaycanda 320 mehmanxana və mehmanxana tipli obyekt fəaliyyət göstərir.

“İlk növbədə, biz daxili turizm haqqında fikirləşməliyik. Xüsusilə biz görürük ki, yay aylarında insanların böyük əksəriyyəti bölgələrə yola düşür. Rayonlarda yeni müəssisələr, turizm yerləri açılır. Yəni biz bunu, ilk növbədə, öz insanlarımızın rahat dincəlməsi üçün etməliyik. Əlbəttə ki, bu, dünya səviyyəsində olmalıdır ki, bizim insanlar bundan istifadə etsinlər və xaricdən də turistlər daha çox gəlsinlər”-deyən ölkə başçısı bundan sonra da Azərbaycanda turizmin inkişafının yüksək səviyyədə olacağını qeyd etmişdir.

İki sahil.- 2008.- 13 avqust.- S.7.