Cəvahir

Prezidentin sərəncamı rejissorları həvəsləndirib

Xəbər verildiyi kimi, Azərbaycan Prezidenti İlham Əliyev «Azərbaycan kinosunun 2008-2018-ci illər üzrə inkişafına dair Dövlət Proqramı»nın təsdiq edilməsi haqqında sərəncam imzalayıb. Sərəncamdan irəli gələn məsələləri həll etmək Nazirlər Kabinetinə tapşırılıb.

«Əhval-ruhiyyəm yüksəldi»

Bəs proqramın təsdiqini rejissorlar necə qarşılayıb?

Mövzu ilə bağlı fikirlərini öyrəndiyimiz, kinorejissor Oqtay Mirqasımov sərəncamı müsbət dəyərləndirdiyini bildirdi: «Bu sərəncam bir daha təsdiqlədi ki, dövlət Azərbaycan kinosunun inkişafında maraqlıdır. Son illərin təcrübəsi göstərir ki, kino inkişafa doğru gedir, plan çərçivəsindən çıxaraq reallığa çevrilib. Filmlərin sayı getdikcə çoxalır, texniki avadanlığa və kinostudiyanın təmirinə vəsait ayrılıb. Avadanlığın yenilənməsi, kino sahəsində gərəkli olan kadr hazırlığına başlanması - bütün bunlar mənim əhval-ruhiyyəmi yüksəldir».

«Növbə bizimdir»

Sərəncamı müsbət addım kimi qiymətləndirən kinorejissor Əbdül Mahmudbəyli bildirdi ki, dövlət kinoya milyonlarla vəsait ayırıb: «Filmlərin çəkilməsi üçün 6 milyon, kinostudiyanın təmiri, maddi-texniki avadanlıqlarla təmin edilməsi üçün isə 50 milyon manat. Az məbləğ deyil. Mən bir kinorejissor kimi, prezidentin sərəncamını kinoda «yaşıl işıq» kimi dəyərləndirirəm. Prezident bununla demək istəyir ki, «sizlər üçün hər bir şərait yaradıram, siz də öz növbənizdə kinonun inkişafı üçün əlinizdən gələni əsirgəməyin».

Bəli, növbə bizimdir. Bir-iki gün əwəl mənə verilən «Əməkdar incəsənət xadimi» fəxri adını da elə hörmətli prezidentimizin kinoya və kino adamlarına qayğısının bir hissəsi sayıram».

«Qolunuzu çirmələyin...»

Kinorejissor Yavər Rzayev də prezidentin kino haqqında sərəncamını yüksək qiymətləndirdiyini bildirdi: «Bir çox adamlar müxtəlif bəhanələr gətirirdilər ki, gözəl filmlər çəkmək istəyirik, amma texniki avadanlıq, maliyyə vəsaiti yoxdur. Budur, dövlət qayğısı; pul da verilir, texniki avadanlıq da. Di qolunuzu çirmələyin, irəli durun və sübut edin ki, gözəl filmlər çəkə bilirsiniz. Dünyanın heç bir ölkəsində kinoya bu qədər dövlət qayğısı yoxdur. Bu işləri prodüser mərkəzləri görür. Amma bizdə bir dənə prodüser yoxdu ki, öz ağlı, təşəbbüsü, gücü hesabma pul tapıb kino çəkdirsin. İndi hökumət bu missiyanı boynuna çəkib, yaxşı filmlər istehsal etmək də bizim işimizdir».

Y.Rzayevin fikrincə, prezidentin sərəncamı yersiz bəhanələrə yer qoymayacaq: «Bu gün dramaturgiya problemi də yaşanır, yaxşı olardı ki, gözəl ssenarilər də yazılsın. Yəni dövlətin pulu batmasın. Fikir vermisinizsə, bir dənə məhəbbət filmi çəkilmir, hamısı qırğın-dava filmləridir. Dünyaya çıxarmaq üçün «Romeo və Cülyetta» səviyyəsində filmlər çəkilməlidir. Bundan başqa, Azərbaycanda uşaq filmləri çəkilmir, bu faciədir. Uşaqlar yaddan çıxıb. Mənim özümün də uşaq filmləri üçün ssenarilərim var. Yaxşı olardı ki, dövlətin kinoya ayırdığı vəsaitin müəyyən hissəsinə uşaq filmləri çəkilsin»."

«Yaxın 5 ildə kinomuz dünyada tanına bilər»

Kinorejissor Şamil Nəcəfzadə bildirdi ki, bu sərəncam kino adamlarının çoxdankı arzusudur: «2006-cı ildə prezident kinoyla bağlı başqa bir sənəd imzalamışdı. Həmin qərardan sonra Mədəniyyət və Turizm Naziri Əbülfəs Qarayevin iştirakı ilə bir qrup kino adamı tərəfindən müzakirə aparıldı. Ümumi rəylər, təkliflər toplanaraq Nazirlər Kabinetinə göndərildi. Biz prezidentin reaksiyasını gözləyirdik, özü də səbirsizliklə. Həmin təkliflərə cavab olaraq srağagün xoş xəbər aldıq. Proqramda geniş mənada kinonun inkişafından söhbət gedir: texnki avadanlığın alınması, filmlərin çəkilməsi, xaricdə təhsil yolu ilə kadr hazırlığı, eləcə də kinoda ikinci dərəcəli işçilərin yetişdirilməsi və s. Əgər sərəncamdan irəli gələn məsələlər reallaşsa, yaxın 5 il ərzində Azərbaycan kinosu dünyada tanına bilər. Mən hesab edirəm ki, sərəncam Azərbaycan kino fenomeninin yaranmasına şərait yaradacaq. Bunun üçün ilk növbədə kəmiyyəti də artırmalı, çoxlu filmlər çəkməliyik».

Ş.Nəcəfzadə bildirdi ki, 20 filmdən 2-3-ü yaxşı ola bilər: «Xarici ölkələrdə də belədir. Keyfiyyət üçün kəmiyyət önə çəkilir. Əgər ildə bir yaxşı fiim çəkilirsə, o ölkənin kinosunun inkişafı üçün ən azı 20 il lazımdır. Heç də hər zaman möcüzələr baş vermir, o cümlədən də kinoda. Düzdür, müəyyən filmlərimiz tanınmış festivallarda iştirak edir, uğur qazanır, amma bu tam deyil. Yaxşı texniki avadanlığımız, kadrlarımız olsa, Azərbaycanı dünyada tanıda biləcəyik. Prezidentin imzaladığı sərəncam da bu sadaladıqlarıma xidmət edir».

Mərkəz.- 2008.- 6 avqust.- S. 7.