İlyasoğlu R.

"Vahid" instrumental ahsamblının ilk çıxışı

Bu günlərdə "Vahid" poeziya evi nəzdində yerli yaradılmış "Vahid" instrumental ansamblı ilk dəfə olaraq konsert proqramı ilə çıxış etmişdir. Tanınmış şair və yazıçıların, görkəmli elm, mədəniyyət və incəsənət xadimlərinin iştirak etdiyi tədbirdə "Vahid" poeziya evinin direktor əvəzi Həsən Həsənov və "Vahid" ədəbi müstəqil şairlər məclisinin sədri Hacı Rafiq Əliyev, şair-publisist Şahin Fazil çıxış edərək yeni yaradılmış "Vahid" instrumental ansamblının üzvlərini təbrik etdilər.

Ansamblın solistləri Oqtay Hacıyev "Mirzə Hüseyn" segahını, Ulduzə Qədirova "Gəl bizə yar" mahnısını, Həbib Rəhimov "Dilkeş" təsnifini, İsmayıl Abasov "Şur" təsnifini, Zöhrə Əliyeva "Kimə yalvarım" xalq mahnısını, Qəzənfər Abbasov "Mahur-Hindi" muğam dəstgahını özünəməxsus ustalıqla ifa etdilər.

Tanınmış xanəndələr, xalq artistləri Canəli Əkbərov və Əlibaba Məmmədov da çıxış edərək ansamblın üzvlərinə müvəffəqiyyətlər arzuladılar.

İngiltərədə yaşayan şoydaşımız, şərqşünas alim, professor Niyazi Quluzadənin gətirdiyi "SKAYP" elektron-kompüter vasitəsilə ansamblın çıxışı Londonda yaşayan həmyerlilərimiz üçün də canlı yayımlandı. Onu da qeyd edək ki, ansamblın bədii rəhbəri Alim Əliyev, konsertmeystr İlhamiz İsmayılovdur.

Konsertin sonunda Bakı Şəhər Mədəniyyət və Turizm İdarəsinin rəisi Əlikram Əliyev ansamblın bütün üzvlərini təbrik etdi. "Vahid" poeziya evinin kollektivinə öz minnətdarlığını bildirdi. O vurğuladı ki, bu gündən "Vahid" adına mükafat təsis olunmaqla muğam konsertlərini Bakıətrafı kəndlərdə keçirmək, gəncləri də bura cəlb etmək vacibdir.

"Vahid" intsrumental ansamblının çıxışı məclis iştirakçılarında xoş ovqat yaratdı.

Respublika.- 2008.- 19 avqust.- S. 5.