Kanadada Azərbaycan muğamı bayramı

 

Toronto Kral Konservatoriyasının professoru Atis Bankasın başçılıq etdiyi Beynəlxalq Niaqara musiqi festivalının rəhbərliyi hər il Niaqarada Azərbaycan muğamı günləri keçirməyi qərara almışdır. Dünyada, o cümlədən Şimali Amerikada Azərbaycan incəsənətinə marağın artmasından irəli gələn bu qərarın həyata keçirilməsinə Heydər Əliyev Fondu yaxından kömək göstərir.

Avqustun 13-də Kanadada Şərq Qərbdə, Qərb Şərqdə, musiqi isə dünyada sülhün carçısıdır yaradıcılıq layihəsi çərçivəsində İpək yolunun sərvəti devizi altında Azərbaycan muğamı günləri keçiriləcəkdir.

Bu tədbir Şərq ilə Qərb arasında mədəni dialoqun yaradılmasında böyük xidmətləri olan Azərbaycan xalqının ümummilli lideri Heydər Əliyevin Niaqara İncəsənət Mərkəzində ucaldılmış büstü önünə güllər qoyulması ilə başlanacaqdır. Musiqi bayramının birinci günü kanadalılar Sahib Paşazadə, Toğrul Əsədullayev və Bəyimxanım Mirzəyevadan ibarət muğam üçlüyünün və baş dirijor İsmayıl Hacıyevin idarəsi ilə İpək yolu kamera orkestrinin birgə çıxışını dinləyəcəklər. Konsertdə Azərbaycan muğamlarından parçalar və xalq mahnıları səslənəcəkdir.
Azərbaycan muğamı günlərində doğma diyarımızdan çox-çox uzaqlarda Azərbaycan musiqisi səslənəcək, o cümlədən fəlsəfə elmləri doktoru Şərif Cəlalinin görkəmli Azərbaycan şərqşünası Aida xanım İmanquliyevanın həyatı və elmi fəaliyyətindən bəhs edən kitabının motivləri əsasında bəstəkar İsmayıl Hacıyevin yazdığı və Heydər Əliyev Fondunun prezidenti, YUNESKO və İSESKO-nun xoşməramlı səfiri Mehriban xanım Əliyevaya həsr olunmuş Sülh qızılgülü musiqili-simfonik dilogiyasının premyerası olacaqdır. Ölkəmizin birinci xanımının səmərəli fəaliyyəti sayəsində xalqımızın zəngin mədəni irsi dünyada daha yaxından tanınır, məhz onun sayəsində Azərbaycan mədəniyyətinin ən yaxşı maddi və mənəvi nümunələrinin qorunub saxlanması və yayılması istiqamətində mühüm layihələr həyata keçirilir.
Azərbaycan xalqının bənzərsiz musiqi sənətinə həsr olunmuş muğam günlərində dünyanın görkəmli musiqiçilərinin, məsələn, Moskva Konservatoriyasının professoru Nina Koqanın iştirakı ilə konsertlər olacaqdır. Belə konsertlərdən biri isə Azərbaycanın qədim ənənələri adlanacaqdır.

Kanadada Azərbaycan muğamı bayramının sonunda Niaqara şəlaləsinin yaxınlığındakı səhnədə təşkil ediləcək böyük muğam konserti şübhəsiz ki, Şərq ilə Qərbin mənəvi yaxınlığının daha bir sübutuna çevriləcəkdir.

 

Xalq qəzeti.- 2008.- 12 avqust.- S. 6.