"Mən 24 Qarabağ xanəndəsindən biriyəm"

"Bir az da gözləyirəm - əgər fəxri ad almasam, bu sənəti atıb özümə başqa iş tapacam"

Xanəndə Sabir Abdullayevin Lent.az-a eksklüziv müsahibəsi

 - Sabir müəllim, bir çox xanəndələr efirə çıxmağa üstünlük versələr də, siz buna o qədər də meyl etmirsiniz. Səbəb nədir?
   - Mən 24 Qarabağ xanəndəsindən biriyəm. Amma efirlərə üstünlük verməmişəm. 1982-ci ildən efirə çıxıram. Mən efirlərdə çıxış edəndə heç kim bilmirdi efir nədir. İlk dəfə 1986-cı ildə Lökbatan qəsəbəsində Bakı musiqi məktəbləri arasında ilk muğam sinfini mən açmışam. Həmin vaxtdan başım tələbələrimə qarışdı. Tələbələrimlə dünyanın 25 ölkəsində olmuşam. Azərbaycanda bizdən başqa uşaq kollektivləri arasında muğamlarımızı dünyada təbliğ edən görməmişəm.
   - Sabir müəllim, indiyədək neçə tələbəniz olub?
   - Sayını-hesabını bilmirəm. Tələbələrimin sayı çoxdur. Amma üzdə olanları var. 1988-ci ildən bu yana bütün Azərbaycanda keçirilən müsabiqələrdə mənim tələbələrim birinci yerdə olub. "Muğam-2007" müsabiqəsinin qalibi Güllü Muradova, "Eurovision-2008"in iştirakçısı Samir, əməkdar artist, vokalist Samir Səfərov, Bahar Lətifqızı, Zülfiyyə Məmmədova mənim tələbələrim olub.
   - Telekanallardan dəvətlər alırsınız?
   - Dəvət edirlər, amma vaxt edib gedə bilmirəm. Vaxt vardı AzTV-də o qədər konsertlərim çəkilirdi. Mənə deyirdilər ki, AzTV-yə niyə gedirsən? Amma indi həmin adamlar özləri çıxıb bu kanalda çıxış edirlər.
   - Niyə hələ də fəxri ad almamısınız?
   - Nazirliyə təqdimatım gedib. Bir dəfə də təqdimatım verilmişdi, amma baxılmadı. Görək indi nə olacaq. Deyəsən, Güllü Muradovanın birinci yerə çıxması ilə əlaqədar mənə fəxri ad verilməlidir. Mən gözümü açandan dövlətə, mədəniyyətə qulluq edirəm. Dünənki, aşağı səviyyəli adamlar fəxri ad alanda adama pis təsir edir axı! Bunların əksəriyyəti mənim gözümün qabağında olub. Biri gedib toyda oxuyur, əməkdar artist adını alır. Mənə baxan yoxdur.
   - Belə çıxır ki, müəllim kimi özünüzü bu sənətə qurban verməyinizə peşmansınız?
   - Mən əvvəldən bilsəydim, müəllim olmazdım. Çünki müəllimlik məni bütün işlərimdən ayırdı, özümə gün ağlaya bilmədim. Beş baş ailə ilə bir otaqlı evdə qalıram. Bir az da gözləyirəm, əgər ad almasam, bu sənəti atıb özümə başqa iş tapacam. Efirdə çıxıb elə adamlar danışır ki.
   - Kimlər danışır?
   - Hamı bilir onlar kimlərdir. Mənim heç kimlə işim yoxdur. Amma demək istəyirəm ki, hərə öz işi ilə məşğul olsa, yaxşı olar.
   - Muğam ifaçıları arasında paxıllıq halları çoxdur?
   - Muğam ifaçılığında o qədər də xanəndə yoxdur ki, bir-birinin paxıllığını çəkələr. Amma muğam ifaçıları arasında qısqanclıq var. Bir adam dünyanı uzun müddət tutub gedə bilməz axı! Bizdən sonra da gələnlər var, bizdən qabaqkılar da var. Hamı bir-birinə yer verməlidir. Bir uşaq yetişdirirsən, hamı sənə düşmən olur. Deyirlər, Sabir Abdullayevin tələbəsi niyə birinci olmalıdır? Sabir Abdullayev işləyir də. Özü də bunu mənə çox yaxın adamlar, neçə illər çörək kəsdiyim dostlarım edirlər. Üzdə gülüb, arxamca danışırlar. Lazım olanda hamısını açıqlayacam. Adamın adını heç bir dəfə çəkməzlər, yada salmazlar?!
   - Prezident təqaüdü alırsınız?
   - Xeyr, versələr, heç ad istəmərəm.
   - Muğam müsabiqəsində tələbənizin birinci yerə çıxması müqabilində heç bir mükafat almadınız?
   - Heç nə almadım. Bir idmançı qalib gələndə onun məşqçisinə də mükafat verilir. Mənə heç nə düşmədi.
   - Toylara gedirsiniz?
   - Toy var ki gedəm? Dəvət etsələr, gedərəm. O qədər cavan uşaqlar var, onları qoyub məni apararlar? Ara-sıra gedirəm, onda da öpüb yola salırlar.
   - Qardaşınız Cabir Abdullayev sizdən cəld tərpənib, efirlərdə tez-tez görünür...
   - Cabir bizdən tez tərpəndi, öz reklamı ilə məşğul oldu. Düz edib, müəllimliyə baş qoşmadı. Mənim böyük qardaşım, rəhmətlik Vahid Abdullayev 26 il Asəf Zeynallı adına Musiqi Texnikumunda çalışdı. İki xalq artisti, əməkdar artistlər yetişdirdi. O da adsız öldü...

Ədalət.- 2008.- 5 avqust.- S. 4.