Dostəli C.

Bakıda UMTS/WSDMA texnologiyası üzrə seminar keçirildi

Avqustun 15-16-da Bakının Park İnn otelində Amerikanın QUALCOMM şirkətinin Mərkəzi Asiya SDMA Forumunun təşəbbüsü, Rabitə İnformasiya Texnologiyaları Nazirliyinin dəstəyi ilə UMTS/WCDMA texnologiyası üzrə ikigünlük seminar keçirilmişdir.Seminarda Azərbaycanın rabitə operatorlarının - Aztelekom İstehsalat Birliyinin, BİTRİB-in, Azərsel, Baksell, Azərfon şirkətlərinin digər rabitə müəssisələrinin mütəxəssisləri iştirak edirdilər.

Seminarı giriş sözü ilə rabitə informasiya texnologiyaları nazirinin müavini İltimas Məmmədov açdı.

Nazir müavini qonaqları seminar iştirakçılarını salamladıqdan sonra belə əhəmiyyətli tədbirin ölkəmizdə keçirilməsinə təşəbbüs göstərən QUALCOMM şirkətinə nazirlik adından təşəkkür etdi. Sonra o, Azərbaycanda tətbiq edilən texnologiyalardan daha səmərəli istifadə oluması üçün adı çəkilən şirkət tərəfindən maraqlı təkliflər verildiyini, həmin təkliflərin yerli operatorlar üçün əhəmiyyətli olacağını nəzərə alaraq nazirliyin bu seminarın keçirilməsinə lazımi dəstək göstərdiyini qeyd etdi.

Natiq Azərbaycanda SDMA standartında texnologiyaların tətbiqinin genişlənməkdə olduğunu vurğulayaraq bu sahədə bir neçə operatorun fəaliyyət göstərdiyini bildirməklə yanaşı, bəzi müəssisə təşkilatların tezlik diapozonundan səmərəli istifadə etmədiklərini, yeni texnologiyalardan istifadədə səmərəliliyi artırmaq üçün bu seminarın əhəmiyyətli olacağını, çıxış məruzələrdən iştirakçıların qiymətli məlumatlar əldə edəcəklərini qeyd etdi, seminarın işinə uğurlar arzuladı.

Sonra QUALCOMM şirkətinin qlobal biznesin inkişafı üzrə baş direktoru Məhəmməd Rahil Kamal, Mərkəzi Asiya SDMA Forumunun sədri Xalid Xan, həmin Forumun icraçı direktoru Syed İsmail Şah MDB ölkələri üzrə koordinatoru Şahida Nurhacıyeva məruzələr söyləmiş, çıxış etdilər seminar iştirakçılarının sualları ətrafında müzakirələr apardılar.

Rabitə dünyası.- 2008.- 21 avqust.- S. 3.