Standartlaşdırma üzrə "İnformasiya-kommunikasiya texnologiyaları" Texniki Komitəsi yaradılmışdır

İnformasiya-kommunikasiya texnologiyaları (İKT) sahəsində beynəlxalq və regional standartlara uyğun milli standartların yaradılması və digər müvafiq tənzimləyici normativ sənədlərin işlənilməsi, onlardan istifadənin effektivliyinin artırılması, beynəlxalq və dövlətlərarası standartlaşdırma işlərində iştirak edilməsi məqsədi ilə Rabitə və informasiya texnologiyaları naziri Əli Abbasov və Standartlaşdırma, Metrologiya və Patent üzrə Dövlət Agentliyinin (SMPDA) baş direktoru Ramiz Həsənovun birgə əmri ilə, Standartlaşdırma üzrə, "İnformasiya-kommunikasiya texnologiyaları" Texniki Komitəsi (TK) yaradılmışdır. TK-nın baza təşkilatı kimi Rabitə və İnformasiya Texnologiyaları Nazirliyinin Məlumat Hesablama Mərkəzi (MHM) müəyyən olunmuşdur. Texniki Komitənin sədri Rabitə və informasiya texnologiyaları nazirinin müavini Elmir Vəlizadə təyin edilmişdir. MHM-in direktoru Nail Mərdanov və SMPDA-nın Standartlaşdırma şöbəsinin müdiri Məzahir Səmədzadə TK-nın sədr müavinləri, MHM-in İnsan resursları və hüquq şöbəsinin müdiri Xalid Mikayılov isə TK-nin məsul katibi təyin olunmuşdur.

Qeyd edək ki, hazırda TK-ya üzv olacaq təşkilatların və nümayəndələrin siyahısı formalaşdırılır. TK-nin fəaliyyətinə metodiki köməklik və əlaqələndirmənin təmin edilməsi RİTN-in Strateji planlaşdırma və elmi potensial şöbəsinə həvalə edilmişdir.

Rabitə dünyası.- 2008.- 8 avqust.- S. 9.