Ağ göl Milli Parkı füsunkar gözəlliyə malikdir

Doğma Azərbaycanın füsunkar, özünəməxsus təbiəti var. Bu təbiət göz oxşayır, insanlarda fərəh doğurur. Amma bütün canlılar kimi, təbiət də qayğı və məhəbbət sevir.

Ölkəmizdə olan qiymətli, nadir təbiət incilərinin mühafizəsi, qorunması və bərpası sahəsində bir sıra direktiv sənədlər qəbul edilmişdir. Ağcabədi və Beyləqan rayonlarının inzibati ərazilərində Ağ göl Milli Parkının yaradılması ana təbiətə dövlət qayğısının konkret nümunəsidir. Ağ göl Milli Parkının direktoru M.Hüseynov bu nadir təbiət guşəsinin tarixi haqqında məlumat verərək deyir:

- 1964-cü ildə 9173 hektar sahədə Ağ göl Dövlət Təbiət Yasaqlığı yaradılmışdır. 1978-ci ildə gölün 4400 hektara bərabər olan su ərazisinə qorunmaq statusu verilmiş və bura Ağ göl Dövlət Qoruğuna çevrilmişdir. 2003-cü ildən isə qoruğun sahəsi genişləndirilərək 17924 hektara çatdırılmış və bura Milli Park elan edilmişdir. Bununla da Azərbaycanın nadir flora və faunasının qorunub gələcək nəsillərə çatdırılması istiqamətində əhəmiyyətli addım atılmışdır.

Ağ göl Azərbaycanın ən məşhur çöl-göl ekosistemi olub, köçəri və yerli quşların, digər heyvanların məskunlaşdığı ərazilərdən biridir. Ağ gölün qorunmasının beynəlxalq əhəmiyyəti var. Bu da göldə adları Beynəlxalq Təbiəti Mühafizə İttifaqının "Qırmızı siyahı"sına və Azərbaycan Respublikasının "Qırmızı kitabı"na daxil edilmiş quşların məskunlaşması ilə bağlıdır.

Ağ göl həm də miqrasiya edən quşların qışlama yeridir. Burada dünya və Azərbaycan Respublikasının "Qırmızı kitabı"larına adları düşmüş filaminqo, turac, soltan toyuğu, kiçik qarabatdaq və digər quşlar məskunlaşır.

Milli Parkın böyük əhəmiyyəti var. Parkın işçiləri buradakı təbiət komplekslərinin, nadir və etalon təbiət ərazilərinin, tarix-mədəniyyət obyektlərinin qorunub gələcək nəsillərə çatdırılması üçün zəruri tədbirlər görürlər. Eyni zamanda, burada turizm və istirahət üçün, təbiəti mühafizənin və ekoloji maarifçiliyin elmi metodlarını hazırlamaq və tətbiq etmək üçün yaxşı şərait yaradılmışdır. Milli Park əhalinin ekoloji maarifləndirilməsi baxımından da olduqca əhəmiyyətlidir və bu istiqamətdə parkda xeyli iş görülür. Ərazidə vaxtaşırı olaraq ekoloji monitorinqlər keçirilir, zədələnmiş təbiət kompleksləri və obyektlər əsl vətəndaş qayğısı ilə bərpa olunur.

Milli Parkda turizm fəaliyyətilə məşğul olmaq üçün geniş imkanlar var. Milli Parkın fəaliyyəti daim dövlət tərəfindən dəstəklənir. Təbiəti qorumaqla, biz cəmiyyətimizin gələcəyini, onun saflığını qorumuş oluruq.

Azərbaycan.- 2008.- 14 avqust.- S. 2.