İndoneziyanın The Jakarta Post qəzeti Azərbaycan haqqında yazır


AzərTAc xəbər verir ki, İndoneziyanın nüfuzlu The Jakarta Post qəzetinin 11 avqust nömrəsində Azərbaycanın xarici işlər naziri Elmar Məmmədyarovun nəşrin müxbiri Veeramalla Angaiaha müsahibəsi dərc olunmuşdur.
İndoneziyalı jurnalist Azərbaycanın birinci xanımı, YUNESKO-nun İSESKO-nun xoşməramlı səfiri, Milli Məclisin deputatı Mehriban Əliyevanın təşəbbüsü ilə Bakıda keçirilən Mədəniyyətlərarası dialoqda qadınların rolunun genişləndirilməsi mövzusunda beynəlxalq forumda iştirak etmişdi.

E.Məmmədyarov müsahibəsində ölkələrimiz arasında münasibətlərdən danışarkən Azərbaycanın xarici siyasətində İndoneziyanın mühüm yer tutduğunu bildirmiş, 2006-cı ildə Azərbaycanın Cakartada səfirliyinin açılmasını bunun daha bir təsdiqi kimi səciyyələndirmişdir. Nazir demişdir ki, Dağlıq Qarabağ münaqişəsi məsələsində İndoneziyanın ölkəmizin ərazi bötövlüyünu dəstəkləməsini yüksək qiymətləndirir. İslam Konfransı Təşkilatı digər qurumlar çərçivəsində İndoneziyanın göstərdiyi səylər təqdirəlayiqdir.
Eyni zamanda, E.Məmmədyarov vurğulamışdır ki, hər iki ölkənin böyük iqtisadi imkanlara malik olmasına baxmayaraq, iqtisadi əlaqələrin hazırkı səviyyəsi qənaətbəxş deyildir.

İndoneziya ictimaiyyətinin Azərbaycan haqqında məlumatlandırılması məsələsinə toxunan nazir bu istiqamətdə Cakartadakı səfirliyimizin fəaliyyətinin əhəmiyyətini vurğulamışdır. O, Ermənistan-Azərbaycan, Dağlıq Qarabağ münaqişəsinin həlli ilə bağlı suala cavabında demişdir ki, ilk gündən etibarən Azərbaycanın münaqişənin həllinə dair mövqeyi dəyişməmişdir. Ermənistan silahlı qüvvələri Azərbaycanın işğal olunmuş ərazilərindən çıxarılmalı bu ərazilərdə Azərbaycanın suveren hüquqları bərpa edilməlidir

 

Azərbaycan.- 2008.- 20 avqust.- S. 2.