Samirə

Mədəniyyətlər Bakıda çulğaşdı

Oljas Süleymenov: "Azərbaycan xalqına məxsus mədəni abidələrin dağıdılması vəhşilikdir"

Həm siyasət, həm də iqtisadiyyat mədəniyyətə söykənməlidir. Yalnız bu halda dünyamiqyaslı böhranlardan yayınmaq mümkündü.

Dünən Bakıda Azərbaycan hökuməti və Avropa Şurasının (AŞ) birgə təşkilatçılığı ilə "Mədəniyyətlərarası dialoq - Avropa və qonşu regionlarda sülhün, davamlı inkişafın əsasıdır" mövzusunda beynəlxalq konfrans öz işinə başladı.

Mədəniyyət və Turizm Nazirliyinin məlumatında qeyd olunur ki, bu, iştirakçıların tərkibi, əhatə etdiyi regionlar və miqyasına görə Avropa və islam ölkələrinin tarixində mədəniyyətlərarası dialoq mövzusunda ilk beynəlxalq tədbirdir. Avropa Şurasının tarixində ilk dəfədir büronun iclası katiblikdə deyil, quruma üzv olan ölkədə təşkil edilir. Ümumilikdə tədbirdə 10 beynəlxalq təşkilatın rəhbəri və 16 nazir iştirak edəcək.

Mətbuat konfransında mədəniyyət və turizm naziri Əbülfəz Qarayev qeyd etdi ki, uzun fasilədən sonra mədəniyyət nazirlərinin konfransının Bakıda baş tutması mühüm əhəmiyyət daşıyır. Nazir vurğuladı ki, tədbirdə müsəlman ölkələrinin nümayəndələrinin də təmsil olunması yenilikdir. Ə.Qarayev: "Konfrans zamanı müzakirə olunacaq mövzular və qəbul ediləcək bəyanatlar, sənədlər, müraciətlər növbəti illərdə Avropa məkanında geniş mübadiləyə əsas verəcək".

Konfransın fəxri qonağı olan Avropa Şurasının baş katibi Terri Devis belə mühüm tədbirin Azərbaycan üçün Avropadakı qonşuları ilə münasibətdə yeni və gözəl imkan yaratdığını qeyd etdi. O, Azərbaycanın bu kimi əhəmiyyətli işi öhdəsinə götürməsini vacib təşəbbüs hesab etdiyini dedi.

İçərişəhərdə aparılan rekonstruksiya işlərini şərh edərkən T.Devis qeyd etdi ki, Bakı canlı və inkişaf edən, qədim şəhərlərdəndir. T.Devis: "Lakin burda qədim şəhərlərdə olduğu kimi, tarixi abidələrlə, tikililərlə yeni inşaat işləri, modern üslub arasında balansı qoruyub-saxlamaq lazımdır".

Konfrans çərçivəsində İSESKO-nun baş direktoru Əbdüləziz bin Osman əl-Tüveycri Terri Devisə mədəniyyətlərarası və sivilizasiyalararası dialoqun inkişafındakı böyük xidmətlərinə görə İSESKO-nun qızıl medalını təqdim etdi.

Konfransda çıxışı zamanı isə əl-Tüveycri dedi: "Bu konfrans mədəniyyətlərarası məsələləri müzakirə etmək üçün çox yaxşı imkandır və Qərblə Şərqin mədəniyyətlərinin birləşməsindən ötrü körpü rolunu oynaya bilər. Konfrans sübut edir ki, cinsindən, inamından və milliyyətindən asılı olmayaraq bütün insanlar bərabərdirlər, azad yaşamaq hüququna eyni dərəcədə malikdirlər. Biz dünya xalqlarını birləşməyə çağırırıq. Yalnız bu yolla daha intensiv inkişaf yoluna qədəm qoya bilərik".

İSESKO tarixi abidələrin monitorinqini aparmaq üçün Dağlıq Qarabağa missiya göndərilməsinə tərəfdardır. İSESKO-nun baş direktoru Əbdüləziz bin Osman əl-Tüveycri: "Dağlıq Qarabağda baş verənlər beynəlxalq hüquqa ziddir. Orada abidələr məhv edilib. Təcavüz hər zaman qınağa tuş gələcək. Biz susmamalıyıq. Faktaraşdırıcı missiya abidələrin ermənilər tərəfindən dağıdılmasına əmin olandan sonra beynəlxalq ictimaiyyət və hüquq müdafiəçiləri bu fakt barədə lazımi səviyyədə məlumatlandırılacaqlar. Mən təəssüf edirəm ki, Ermənistan nümayəndələri bu konfransda iştirak etmirlər. Bu hərəkətləri ilə onlar dialoqa girmək imkanlarını əldən veriblər...".

Konfransın işində iştirak edən dünyaşöhrətli yazıçı və ictimai xadim Oljas Süleymenov jurnalistlərə açıqlamasında dedi ki, işğal altında olan ərazilərdə Azərbaycan xalqına məxsus mədəni abidələrin dağıdılması vəhşilikdir. O.Süleymenov: "Burada qeyri bir fikir ola bilməz - öz mədəniyyətini qoruyan xalq digər xalqın maddi və mənəvi abidələrinə də eyni münasibəti göstərir. Dünyadakı böhran vəziyyəti fonunda mədəniyyətlər arasında dialoqun baş tutması çox vacibdir. Hazırda konfransda müzakirə olunan məsələlərdən biri ondan ibarətdir ki, həm siyasət, həm də iqtisadiyyat mədəniyyətə söykənməlidir. Yalnız bu halda dünyamiqyaslı böhranlardan yayınmaq mümkündür".

55 ölkənin müxtəlif qurum və təşkilatlarının nümayəndələrinin iştirak etdiyi konfrans 3 seksiyada keçirilir - "Ağ kitabın müzakirəsi", "Siyasətin mədəni proqramları və təşəbbüsləri: yeni anlayışlar", "İrs və mədəniyyətlərarası dialoq - millidən universaladək". Konfransın 2-ci günü Bakı deklarasiyasının qəbulu gözlənilir. Sənəddə Avropa Şurasına üzv ölkələrin və islam dövlətlərinin mədəniyyət və turizm nazirlərinin fəaliyyəti üçün prioritet istiqamətlər öz əksini tapacaq. Bəyannamədə həmçinin mədəniyyətlərin yaxınlaşması, təbliği və mübadiləsinə aid müddəalar əks olunacaq.

Həftə içi.- 2008.- 3 dekabr.- S. 6.