Bakı Qafqazın mədəniyyət paytaxtı ola bilər

XƏbƏr verdiyimiz kimi, dekabrın 9-dan 14-dək paytaxtımızda II Rostropoviç festivalı keçirilir. Festivalın direktoru Mənaşir Yaqubovun fikrincə, Bakıda Rostropoviç festivalının keçirilməsi nəinki qanunauyğundur, həm də Azərbaycan paytaxtının Qafqazın mədəniyyət paytaxtı kimi tanınması təbii olardı. M.Yaqubov: "Rostropoviçin vətəni olan Bakı unikal, çoxmilliyyətli mədəniyyətə və zəngin, qədim ənənələrə malikdir. Buna görə də şəhərinizin Qafqazın mədəniyyət mərkəzi kimi tanınması məntiqlidir". M.Maqomayev adına Azərbaycan Dövlət Filarmoniyasında keçirilən açılış mərasimində çıxışı zamanı mədəniyyət və turizm naziri Əbülfəz Qarayev bildirdi: "Dahi bakılı, görkəmli musiqiçi olan Mstislav Rostropoviç Festivalı - dünya miqyasında qiymətləndiriləcək mədəniyyət hadisəsidir. Biz əlimizdən gələni əsirgəməyəcəyik ki, bu festival hər il baş tutsun". Bu gün festival çərçivəsində filarmoniyada bədii rəhbəri və baş dirijoru Teymur Göyçayev olan Gənclər Simfonik Orkestrinin və M.L.Rostropoviç Fondunun təqaüdçülərinin və Qalina Vişnevskayanın Opera İfaçılığı Mərkəzinin solistlərinin konsertləri nəzərdə tutulub.

Həftə içi.- 2008.- 11 dekabr.- S. 8.