Hacızadə A.

Moskvada Heydər Əliyev. Şəxsiyyət və Zaman çoxcildliyinin təqdimatı olmuşdur

Dekabrın 11-də Moskvada görkəmli siyasətçi və dövlət xadimi Heydər Əliyevin xatirə gecəsi təşkil edilmişdir. Tədbirdə "Heydər Əliyev. Şəxsiyyət və Zaman" seriyasından olan kitabın təqdimat mərasimi keçirilmişdir. Müəllifi tanınmış Azərbaycan yazıçısı, publisist, Milli Məclisin deputatı Elmira Axundovadır. Heydər Əliyevin ilk bioqraflarından biri olan E.Axundova bu görkəmli şəxsiyyətin həyat və fəaliyyətinin naməlum səhifələrindən bu çoxcildlik roman-tədqiqatında bəhs edir.

Azərbaycan xalqının ümummilli lideri Heydər Əliyevin xatirə gecəsi və nəşrin artıq çapdan çıxmış 4 cildinin təqdimat mərasimi Heydər Əliyev Fondunun Rusiya Federasiyasındakı nümayəndəliyi və Azərbaycanın Rusiyadakı səfirliyi tərəfindən təşkil edilmişdir. Rusiya Dövlət Kitabxanasının Şərq Ədəbiyyatı Mərkəzində keçirilmiş tədbirdə Rusiyanın dövlət hakimiyyəti nümayəndələri, tanınmış rusiyalı tarixçilər, politoloqlar, ədəbiyyatçılar, Azərbaycan diasporunun nümayəndələri iştirak edirdilər.

Giriş sözü ilə çıxış edən Azərbaycanın Rusiyadakı səfiri Polad Bülbüloğlu Heydər Əliyev Fondunun Rusiyadakı nümayəndəliyinə və kitabxananın rəhbərliyinə Moskvada xatirə gecəsinin və təqdimatın keçirilməsinə görə təşəkkür etmişdir. O demişdir ki, beş il bundan əvvəl biz xalqımızın görkəmli oğlunu, böyük siyasətçini, müasir Azərbaycanın memarını itirdik.

zərbaycanın bugünkü bütün nailiyyətləri, o cümlədən ölkəmizlə Rusiya arasında səmimi dostluq münasibətləri məhz Heydər Əliyevin sayəsində mümkün olmuşdur. Diplomat xüsusi vurğulamışdır ki, əsası Heydər Əliyev tərəfindən qoyulmuş dövlət siyasəti bu gün Azərbaycan Prezidenti İlham Əliyev tərəfindən uğurla davam etdirilir.

Rusiya Dövlət Kitabxanasının direktoru Viktor Fyodorov bildirmişdir ki, Azərbaycanın görkəmli dövlət xadiminin xatirə gecəsinin bu kitabxanada keçirilməsinə görə çox şaddır. O demişdir ki, şəxsiyyətin tarixdə rolu maraqlı mövzudur və Azərbaycanın bütün sahələrdə qazandığı uğurlar ölkənin bənzərsiz mədəniyyətinin qorunub saxlanması və öz tarixinə hörmət kontekstində inkişaf edir.

Görkəmli qazax yazıçısı, Heydər Əliyevin böyük dostu Oljas Süleymenov Parisdən məxsusi olaraq bu kitabın təqdimat mərasiminə gəlmişdi. O, E.Axundovanın romanını yüksək qiymətləndirərək demişdir ki, bu kitablar çox böyük zəhmət bahasına başa gəlmişdir. O.Süleymenov ulu öndər haqqında xatirələrini söyləyərək vurğulamışdır ki, Heydər Əliyev böyük insan idi və mən onu özümün "ustadım", yəni Müəllimim hesab edirəm. O, ulu öndərlə görüşlərindən söhbət açaraq demişdir ki, əgər Heydər Əliyev həmin dövrdə ölkənin rəhbəri olsaydı, Qarabağ faciəsi və Azərbaycan tarixindəki digər dəhşətli hadisələr də olmazdı. Keçid dövründə dövlətə diletantlar, səriştəsiz adamlar yox, Heydər Əliyev kimi təcrübəli siyasətçilər başçılıq etməlidir. Bu yaxınlarda mən Avropa ölkələrinin mədəniyyət nazirlərinin Bakıda keçirilən iclasında iştirak etmişəm. Mən oradakı çıxışımda qeyd etdim ki, dünyada indiki böhran şəraitində Azərbaycandan başqa heç yerdə mədəniyyət haqqında söhbət getmir. Bu, onu göstərir ki, Azərbaycan düz yoldadır və onun siyasətindən nümunə götürmək lazımdır. Bu doğru yolun təməlini Heydər Əliyev qoymuşdur və bu gün onun davamçıları həmin yolu uğurla davam etdirirlər.

Çoxsaylı bioqrafik romanlar müəllifi, tarixçi Roy Medvedev öz çıxışında E.Axundovanın kitabını məşhur bioqrafik romanların ən yaxşılarından biri adlandırmışdır. O demişdir ki, Heydər Əliyev haqqında kitab son dərəcə maraqlıdır, çünki bu insanın şəxsiyyəti həmin kitabda hərtərəfli açıqlanır. Heydər Əliyevin şəxsiyyəti maraqlı olduğuna görə, onun karyerası və hərəkətləri də, Azərbaycanın ən çətin dövründə bu dövlətə başçılıq etməsi də maraq doğurur. Roy Medvedev dedi: "Mübaliğəsiz deyə bilərəm ki, müəllifin çox böyük obyektivliyi, arxivlərdə apardığı titanik iş, müasirlərimizlə söhbətləri bu kitabın böyük məziyyətidir və o, politoloji və tarixi ədəbiyyatda öz layiqli yerini tutacaqdır".

Keçmiş SSRİ Nazirlər Soveti sədrinin birinci müavininin katibliyinin müdir müavini Vladimir Uxov, sabiq Zaqafqaziya hərbi dairəsinin ordu komandanı Konstantin Koçetov, İTAR-TASS-ın baş direktorunun birinci müavini Mixail Qusman, "Kultura" qəzetinin baş redaktoru Yuri Belyavski, keçmiş SSRİ DTK-nın məsul işçisi Georgi Pozdorovkin zəmanəmizin görkəmli şəxsiyyəti haqqında xatirələrini bölüşmüşlər. Onlar Heydər Əliyevlə təmasları ilə bağlı nadir epizodları, onun qeyri-adi siyasi istedadı və incə qəlbli bir insan olması barədə söhbət açmışlar.

Heydər Əliyevin hər şeydən əlavə, həm də görkəmli diplomat olduğunu vurğulayan M.Qusman demişdir ki, Heydər Əliyevin Klintonla söhbətinin artıq məxfilikdən çıxarılmış stenoqramını oxuyarkən onun əsl böyük diplomat kimi dünyanın ən qüdrətli ölkələrindən birinin prezidenti ilə tam bərabər səviyyədə söhbət aparması məni heyran etmişdir.

Sonda Elmira Axundova Heydər Əliyev Fondunun Prezidenti, Milli Məclisin deputatı Mehriban Əliyevaya, Fondun Rusiyadakı nümayəndəliyinin rəhbərliyi Leyla Əliyevaya, Rusiya Dövlət Kitabxanasının direktoru Fyodorova və toplaşanların hamısına bu tədbirin təşkilinə və iştirak etdiklərinə görə səmimi təşəkkürünü bildirmişdir. E.Axundova demişdir ki, indi roman-tədqiqatın beşinci və altıncı cildləri üzərində iş gedir. "Qayıdış" adlanacaq bu cildlərə yeni, geniş oxucu auditoriyasına çox məlum olmayan sənədli materiallar və müsahibələr daxil olacaqdır.

Azərbaycan.- 2008.- 13 dekabr.- S. 7.