Dünya Azərbaycanlılarının Əlaqələndirmə Şurası iclasının iştirakçılarının bir qrupu Almaniyada yaşayan azərbaycanlı rəssamın fərdi sərgisi ilə tanış olmuşdur

 

AzərTAc xəbər verir ki, dekabrın 19-da Dünya Azərbaycanlılarının Əlaqələndirmə Şurasının Bakıda keçirilən iclasının iştirakçılarının bir qrupu Bakı Slavyan Universitetində (BSU) Almaniyada yaşayıb-yaradan soydaşımız, tanınmış rəssam Əşrəf Heybətovun "Almaniya Azərbaycan rəssamının gözü ilə" adlı fərdi sərgisində olmuşlar.

Şuranın iclasının proqramı çərçivəsində Alman-Azərbaycan Cəmiyyətinin təşəbbüsü, Diaspor ilə İş üzrə Dövlət Komitəsi, Azərbaycan Rəssamlar İttifaqı və BSU-nun dəstəyi ilə təşkil olunmuş sərgi ilə tanışlıq qonaqlarda xoş təəssürat oyatmışdır. Maynts-Azərbaycan Cəmiyyətinin sədri Başar Kömür qonaqlar adından çıxış edərək ulu öndər Heydər Əliyevin xarici ölkələrdə yaşayan azərbaycanlılara xüsusi diqqət qayğısını xatırlatmış, xaricə səfərləri çərçivəsində azərbaycanlılarla görüşlər keçirdiyini, azərbaycançılıq ideologiyasının yayılması dünya azərbaycanlılarının həmrəyliyi istiqamətində gördüyü işləri xüsusi qeyd etmişdir.

Yaradıcılığında Şərq ənənələrini Qərb plastikası ilə üzvi şəkildə birləşdirən Əşrəf Heybətov Bakıda doğulub boya-başa çatsa da, xarici ölkələrdə Azərbaycan rəssamlıq məktəbinin və incəsənətinin təbliği ilə məşğul olur. Milli kolorit, Şərq fəlsəfəsi adət-ənənələrimiz fırça ustasının əsərlərində geniş tərənnüm edilir.
Sərgidə Almaniya şəhərlərinin mənzərələri təsvir olunmuş rəsmlər tamaşaçılar tərəfindən maraqla qarşılanmışdır.

Sonra qonaqlar universitetin kitabxanası, muzeyi və radioqovşağı ilə tanış olmuşlar

 

Azərbaycan.- 2008- 20 dekabr.- S. 5.