“Alman-Azərbaycan dostluq əlaqələri” filminin təqdimatı keçirildi

Mədəniyyət və Turizm Nazirliyi, Alman-Azərbaycan Cəmiyyətinin təşəbbüsü ilə çəkilən "Alman-Azərbaycan dostluq əlaqələri " adlı sənədli filmin təqdimatı keçirilib. Kopellhausda keçirilən təqdimat mərasimində Almaniyada keçirilən Azərbaycan mədəniyyət ilinin yekunu olaraq iştirakçılara cəmiyyətin mükafatları da təqdim olunub. 49 dəqiqəlik "Alman-Azərbaycan dostluq əlaqələri" adlı sənədli filmin çəkilişləri, əsasən, Almaniyada aparılıb. Filmdə Drezdendə saxlanılan "Dədə Qorqud " eposu, Mirzə Şəfi Vazehin Fridrix Bodenştedtlə dostluğu, Leipzig dövlət kitabxanasında Azərbaycana dair kitablar, Berlin incəsənət muzeyində saxlanılan qədim musiqi alətləri və antik geyimlər lentə alınıb. Bundan başqa film almanların Azərbaycanda məskunlaşma tarixindən də bəhs edir.

   Təqdimat mərasimində Mədəniyyət və Turizm nazirinin müavini Ədalət Vəliyev 2008-ci ildə Almaniyada keçirilən Azərbaycan mədəniyyət ilinin təşkilindən danışdı. Yeri gəlmişkən, Ədalət Vəliyev iki ölkə arasında mədəni əlaqələrin inkişafındakı xidmətinə görə Alman-Azərbaycan Cəmiyyətinin "Dostluq" medalı ilə təltif olunub. Həmçinin, Rauf Abdullayev, Fikrət Əlizadə, Alim Qasımov, Məcnun Kərimov, Salman Qəmbərov "Körpü diplomu" ilə mükafatlandırıldı. Sonra film nümayiş olunub.

Səs.- 2008.- 26 dekabr.- S. 12.