Almaniyada Azərbaycan ili başa çatır

Almaniyada Azərbaycan ilinin başa çatması ilə əlaqədar mərasimlər Ştutqart şəhərindən start götürmüşdür. Rəsmi bağlanış mərasimində iştirak etmək üçün Azərbaycan Respublikası Baş nazirinin müavini Elçin Əfəndiyevin rəhbərliyi ilə nümayəndə heyəti dekabrın 2-də Almaniyaya yola düşmüşdür.

Nazirlər Kabinetinin mətbuat xidmətindən bildirmişlər ki, müstəqil Azərbaycan dünya birliyinin siyasi, iqtisadi, mədəni məkanlarına uğurla inteqrasiya etməkdədir. Bu baxımdan Azərbaycan Prezidenti İlham Əliyevin təşəbbüsü ilə 2008-ci ildə dünyanın aparıcı dövlətlərindən olan Almaniya Federativ Respublikasında irimiqyaslı mədəni layihənin – “Azərbaycan ili”nin təşkili xüsusi əhəmiyyətə malikdir. Qədim tarixə malik xalqımızın zəngin mədəniyyətinin Almaniyada tanıdılması istiqamətində atılan uğurlu addımlardan olan “Azərbaycan ili” respublikamızın Mədəniyyət və Turizm Nazirliyi və Almaniyanın “Dr.Qabriela Mints Menecment” Cəmiyyəti tərəfindən Azərbaycanın həmin ölkədəki səfirliyinin yaxından iştirakı ilə həyata keçirilmişdir.

Bu ilin əvvəlində Berlin şəhərindən start götürən “Azərbaycan ili” çərçivəsində Ştutqart, Drezden, Leypsik, Maynts, Hamburq, Münxen şəhərlərində keçirilən müxtəlif tədbirlərdə respublikamızın görkəmli mədəniyyət xadimləri, incəsənət ustaları və tanınmış bədii kollektivləri çıxış etmişlər. Berlin Brandenburq Elmlər Akademiyasında mətbuat nümayəndələri ilə görüş, “Arsenal” kinomərkəzində Azərbaycan filmlərindən ibarət festival, dünya azərbaycanşünas alimlərinin iştirakı ilə “Dirçələn Azərbaycan” mövzusunda simpozium, “Azərbaycan bu gün” adlı fotosərgi və digər tədbirlər maraqla qarşılanmışdır. Maynts və Ştutqart şəhərlərində Azərbaycanın muğam və caz ifaçılarının, habelə Dövlət Rəqs Ansamblının çıxışları yaddaqalan olmuşdur. Almaniyanın nüfuzlu “Der Taqesşpiqel” qəzetinin ölkəmizə həsr etdiyi xüsusi buraxılışı böyük tirajla yayılmışdır.

Almaniyada Azərbaycan mədəniyyət ilinin yekunu ilə əlaqədar ölkəmizin elm, mədəniyyət xadimlərinin və incəsənət ustalarının müxtəlif şəhərlərdə geniş proqramlarla çıxışları, maraqlı sərgilər, təqdimat mərasimləri və təntənəli yekun konserti nəzərdə tutulmuşdur.

Xalq qəzeti.- 2008.- 3 dekabr.- S. 3.