Seyidov V.

Almaniyada Azərbaycan ili başa çatmışdır

“Almaniyada Azərbaycan İli”nin başa çatması münasibətilə Ştutqartda təntənəli mərasim keçirilmişdir.

Yekun tədbirlərində Azərbaycan Respublikası Baş nazirinin müavini Elçin Əfəndiyevin rəhbərliyi ilə nüfuzlu nümayəndə heyəti iştirak etmişdir.

Xatırladaq ki, 2008-ci ildə “Almaniyada Azərbaycan İli” adlı genişmiqyaslı mədəni layihənin həyata keçirilməsi ideyasını Azərbaycan Respublikasının Prezidenti İlham Əliyev irəli sürmüşdü. Müvafiq tədbirlər isə Almaniyadakı Azərbaycan diasporu nümayəndələrinin fəal dəstəyi ilə Azərbaycanın Mədəniyyət və Turizm Nazirliyi, ölkəmizin AFR-dəki səfirliyi tərəfindən təşkil edilmişdir. Almaniya Avropa İttifaqında Azərbaycan mədəniyyəti İlinin keçirildiyi ilk ölkədir. Layihənin məqsədi Almaniya ictimaiyyətini Azərbaycanın qədim tarixi ilə tanış etmək, Azərbaycan xalqının zəngin mədəniyyətini və gözəl ənənələrini Avropa İttifaqının üzvü olan ən böyük ölkədə populyarlaşdırmaq idi.

Layihəyə bu ilin əvvəlində Almaniyanın paytaxtı Berlində başlanmış, sonra isə ölkənin digər şəhərlərində - Mayns, Drezden, Leypsiq, Ştutqart, Hamburq və Münxendə müxtəlif tədbirlər keçirilmişdir. Azərbaycanın keçmişinə və bu gününə həsr edilmiş fotosərgilərdə, konsertlərdə, vernisajlarda, seminarlarda, elmi konfranslarda Almaniyanın sıravi vətəndaşları xalqımızın tarixinin mühüm səhifələri ilə, ulu öndər Heydər Əliyevin müdrik və uzaqgörən siyasəti sayəsində dünya birliyində layiqli yer tutmuş və hazırda Prezident İlham Əliyevin rəhbərliyi altında regionun lider dövlətinə çevrilmiş müstəqil Azərbaycanın qazandığı uğurlarla, ölkəmizin görkəmli ədəbiyyat, musiqi, incəsənət və elm xadimlərinin nailiyyətləri ilə tanış olmaq üçün gözəl imkan əldə etmişlər. Ona görə də inamla deyə bilərik ki, “Almaniyada Azərbaycan İli” layihəsi çox böyük uğur oldu.

Dekabrın 2-də Almaniyanın Saksoniya əyalətinin paytaxtı Drezden şəhərində layihə çərçivəsində “Azərbaycan - Odlar yurdu” adlı tətbiqi sənət nümunələri sərgisi açılmışdır. Bu ilin avqust-noyabr aylarında həmin sərgi Berlin Etnoloji Muzeyində göstərilmişdir. Drezdendə isə sərgi məşhur Dövlət Etnoqrafiya Muzeyində keçirilmişdir. Sərgidə xalq tətbiqi sənəti nümunələri, qədim xalçalar, musiqi alətləri, ümumiyyətlə, xalqımızın qədim tarixini və zəngin mədəniyyətini əks etdirən iki yüzdən çox eksponat alman ictimaiyyətinin diqqətinə təqdim olunmuşdur. Sərginin açılışında Saksoniya əyalətinin Etnoqrafik kolleksiyalar idarəsinin direktoru Klaus Daymler, Saksoniya Mədəniyyət və Elm Nazirliyinin idarə rəisi Tomas Früh, Berlin Etnoloji Muzeyinin Şərq departamentinin rəhbəri İnqrid Şindlbek, Azərbaycanın Almaniyadakı səfiri Pərviz Şahbazov çıxış etmişlər. Onlar bu cür tədbirlərin Azərbaycan tarixinin və mədəniyyətinin Avropada tanıdılması işində əhəmiyyətini vurğulamışlar.

Dekabrın 3-də Mayns şəhərində Azərbaycan Dövlət Rəqs Ansamblının iştirakı ilə konsert olmuşdur. “Mayns – Azərbaycan Cəmiyyəti” diaspor təşkilatının, respublikamızın Mədəniyyət və Turizm Nazirliyinin və Almaniyadakı səfirliyinin dəstəyi ilə təşkil edilmiş konsert böyük uğurla keçmişdir. Konsertdən sonra səfir Pərviz Şahbazov Maynsda yaşayan həmvətənlərimizlə görüşmüşdür.

Dekabrın 4-də Ştutqartın məşhur Linden Muzeyinin konsert salonunda tanınmış caz ifaçısı Emil Məmmədovun və tarzən Mircavad Cavadovun konserti olmuşdur. Konserti Almaniyadakı “Dr. Gabriela Mints Menecment” cəmiyyətinin sədri xanım Qabriela Mints açaraq qonaqları salamlamış və demişdir ki, Azərbaycan İli çox böyük uğurla keçir.

Tamaşaçılar Azərbaycan sənətçilərinin çıxışlarını böyük maraqla qarşılamışlar.

Dekabrın 5-də Azərbaycan nümayəndə heyətinin başçısı Elçin Əfəndiyev Ştutqartın meri Volfqanq Şults ilə görüşmüşdür. Görüşdə Azərbaycan-Almaniya ikitərəfli münasibətlərinin indiki vəziyyəti və perspektivləri müzakirə edilmiş, Almaniyada Azərbaycan İlinin iki xalq arasında mədəni əlaqələrin möhkəmləndirilməsində rolu vurğulanmışdır.

Şturtqart Ədəbiyyat Evində almaniyalı aktyor Ditrix Mattaus xalq yazıçısı Anarın almancaya tərcümə edilmiş “Beşmərtəbəli evin altıncı mərtəbəsi” romanından parçalar və alman dilində Azərbaycan xalq nağıllarını oxumuşdur.

Sonra “Şərqin və Qərbin şərab mədəniyyəti” mövzusunda şərab sərgisi təşkil edilmişdir. Qonaqlar azərbaycanli şərabçıların nailiyyətləri ilə tanış olmaq, içkiləri dequstasiya etmək imkanı qazanmışlar Almaniyanın keçmiş dövlət katibi, “Almaniya-Azərbaycan” forumunun sədri Otto Hauzer sərgidə çıxış etmişdir. O, hər iki ölkədə şərabçılığın tarixindən söhbət açımış, XIX əsrin əvvəlində Azərbaycana köçmüş almanların bu sahənin inkişafına böyük töhfə verdiklərini xatırlatmışdır.

Elə həmin gün “Noyşlos” hökumət sarayında layihənin başa çatmasına həsr edilmiş təntənəli mərasim və Azərbaycan incəsənət ustalarının iştirakı ilə yekun qala-konsert olmuşdur. Mərasimdə Azərbaycan nümayəndə heyətinin başçısı Elçin Əfəndiyev çıxış etmişdir. O, Almaniyada Azərbaycan İlinin iştirakçılarına və qonaqlara Azərbaycan Prezidenti İlham Əliyevin salamını çatdırmışdır. Elçin Əfəndiyev öz çıxışında Almaniya ilə Azərbaycan arasında bütün sahələrdə, o cümlədən mədəniyyət sahəsində qarşılıqlı faydalı əməkdaşlığın genişlənməsini vurğulamışdır. O, Azərbaycan xalqının ümummilli lideri Heydər Əliyevin uzaqgörən siyasəti, müstəqil Azərbaycan dövlətinin təşəkkülündə onun rolu, habelə müasir mərhələdə ölkəmizin inkişafı və modernləşməsi məsələləri barədə danışmışdır. Xüsusi vurğulanmışdır ki, Ermənistanın Azərbaycana qarşı təcavüzü və bunun nəticəsində bir milyona yaxın azərbaycanlının öz doğma yurdundan qovulması təkcə iqtisadiyyata və regional təhlükəsizliyə deyil, mədəniyyətə də çox böyük zərər vurmuş, işğal edilmiş ərazilərdə yüzlərlə mədəniyyət abidəsi məhv edilmişdir. Baş nazirin müavini demişdir ki, buna baxmayaraq, Azərbaycan hökuməti ölkəmizdə mədəniyyətin inkişafına böyük diqqət yetirir. Bu cür layihələrin həyata keçirilməsi həmin qayğının əyani sübutudur.

Mərasimdə Baden-Vürtemberq federal əyalətinin dövlət katibi Georq Vaker və “Almaniya-Azərbaycan” forumunun sədri Otto Hauzer çıxış etmişlər. Onlar AFR-də Azərbaycan İlinin uğurla keçməsini və iki ölkə arasında mədəni əlaqələrin möhkəmlənməsi üçün bu cür layihələrin vacibliyini vurğulamışlar.

Sonra qədim xalq çalğı alətləri ansamblının, bəstəkar, xalq artisti Firəngiz Əlizadə və xalq artisti Möhlət Müslümovun, Azərbaycan Dövlət simfonik orkestrinin və Almaniyanın məşhur Minquet kvartetinin iştirakı ilə yekun qala-konsert olmuşdur. Almaniyanın SWR teleradio kanalı həmin konserti yayımlamışdır. Azərbaycan mədəniyyət və turizm nazirinin müavini Ədalət Vəliyev Azərbaycan İlinin keçirilməsinə kömək etdiklərinə görə almaniyalı tərəfdaşlara təşəkkürünü bildirmiş və nazirin adından onlara xatirə hədiyyələri təqdim etmişdir.

Yekun tədbirlərində Milli Məclisin deputatları Əkrəm Abdullayev, Nizami İsgəndərov və Rövşən Rzayev də iştirak etmişlər.
Konsertdən sonra Azərbaycan İlinin bağlanışına həsr edilmiş rəsmi qəbul olmuşdur.

Dekabrın 6-da Baden-Vürtemberq əyalətinin baş naziri Günter Ottinger öz iqamətgahında Azərbaycan nümayəndə heyətinin şərəfinə nahar vermişdir.

Xalq qəzeti.- 2008.- 7 dekabr.- S. 2.