Tarix Muzeyində elektron gildlər hazırlanır

Azərbaycan Dövlət Tarix Muzeyinin elmi işlər üzrə direktor müavini Nərgiz Əliyevanın "Səs" qəzetinə verdiyi məlumata əsasən, hazırda muzeydə elektron gildlərin hazırlanması prosesi gedir.

Azərbaycan muzeylərinin içərisində, ilk dəfə olaraq, məhz tarix muzeyində tədbiq olunacaq elektron gildlər üç dildə hazırlanır.

Azərbaycan, rus və ingilis dillərində hazırlanan gildlərin gələcəkdə ərəb, fars dillərində də hazırlanması nəzərdə tutulmuşdur. Nərgiz xanımın sözlərinə əsasən, muzeyin ekspozisiyası təmir-bərpa işlərindən sonra daha da zənginləşmiş, məhz bu baxımdan, elektron gildlərdə bütün bunlar haqqında məlumatın yerləşdirilməsinə müəyyən zaman tələb olunur. Odur ki, bu cildlər 45 dəq, 60 dəq gild və bundan da artıq bir zamanı əhatə edə bilər. Nərgiz xanım onu da qeyd etdi ki, bu elektron gildlərin muzeyə gələn qonaqlara təqdim olunması yanvar ayından reallaşacaq.

Nərgiz xanım tarix muzeyində aparılan işlərlə bağlı məlumat zamanı onu da bildirdi ki, dekabrın sonunda muzeyin təşkilatçılığı ilə Azərbaycanda, ilk dəfə olaraq, "Xəzər atlantidası - 40" sərgisi keçiriləcək. Sərgi zamanı "Xəzər atlantidası" kataloqunun təqdimatı olacaq.

Səs.- 2008.- 17 dekabr.- S. 12.