Azərbaycan aliminin məruzəsi maraqla qarşılanmışdır

AzərTAc xəbər verir ki, dekabrın 1-dən 5-dək İtaliyanın Florensiya şəhərində bu ölkənin Romualdo del Bianko Fondu və Florensiya Universitetinin birgə təşkilatçılığı ilə islam memarlıq abidələrinin qorunması probleminə həsr olunmuş beynəlxalq konfrans keçirilmişdir.

Türkiyə, İran, Qazaxıstan, Azərbaycan, Rusiya, Suriya, Misir, Sudan, İtaliya və Fransa alimlərinin iştirak etdikləri konfransda Azərbaycan Milli Elmlər Akademiyası Şərqşünaslıq İnstitutunun direktoru, Milli Məclisin deputatı, professor Gövhər Baxşəliyevanın "İslam memarlıq abidələri ümumbəşəri maddi-mənəvi dəyərlər kontekstində" mövzusunda məruzəsi dinlənilmişdir.

G.Baxşəliyeva islam memarlıq abidələrinin yaranması tarixindən danışmış, bu nümunələrin ümumbəşər mədəniyyətinin ayrılmaz tərkib hissəsi olduğunu vurğulamışdır. Onların qorunaraq gələcək nəsillərə çatdırılmasının vacibliyini qeyd etmişdir.

O, Ermənistan silahlı qüvvələri tərəfindən işğal olunmuş Azərbaycan ərazilərində islam sivilizasiyasının bütün izlərinin silindiyini, bir milyondan artıq azərbaycanlının öz ata-baba yurdundan qovulduğunu, islam maddi mədəniyyət abidələrinin tamamilə məhv edildiyini söyləmişdir. Ermənilər tərəfindən məscidlərin dağıdılması, müsəlman məzarlıqlarının yerlə yeksan edilməsi, Qurani-Kərimin nüsxələrinin yandırılması və digər antibəşəri faktlar diqqətə çatdırılmışdır.

Bildirilmişdir ki, hətta İslam Konfransı Təşkilatı kimi çox nüfuzlu beynəlxalq qurum "Ermənistan Respublikasının təcavüzü nəticəsində Azərbaycan Respublikasının işğal olunmuş ərazilərində islam tarixi və mədəniyyəti abidələrinin məhv edilməsi və dağıdılması" haqqında qətnamə də qəbul etmişdir. Təəssüf ki, işğalçı Ermənistan bu və BMT, Avropa Şurası, ATƏT kimi digər nüfuzlu beynəlxalq təşkilatların qəbul etdikləri qərar və qətnamələri hələ də qulaqardına vurur.

Azərbaycan.- 2008.- 7 dekabr.- S. 5.