Vəliyev M.

 

Ölkəmizdə kurort-sanatoriya şəbəkəsi müasir standartlar səviyyəsindədir

 

Azərbaycanda baş verən köklü islahatlar ölkənin iqtisadiyyatında, sosial həyatında və digər sahələrində əhəmiyyətli dəyişikliklərlə nəticələndi. Siyasi, iqtisadi və sosial inkişafın təxirəsalınmaz vəzifələri sırasında insanların fiziki və ruhi sağlam qüvvələrin hazırlanmasına da diqqəti artmışdır. Əhalinin sağlamlığının qorunması müasir dövrümüzdə dövlətin qarşıya qoyduğu məqsədlər sırasında mühüm yer tutur. Ölkədə aparılan bu siyasət ümummilli liderimiz Heydər Əliyev tərəfindən hələ sovet məkanında yaşadığımız illərdə öz həllini tapmışdı.

Onun Azərbaycanda kurort şəbəkəsinin inkişafı naminə göstərdiyi əvəzsiz xidmətlər bu gün də böyük qürur hissi ilə xatırlanır. Məhz ümummilli liderin təşəbbüsü, cəsarətli mübarizəsi nəticəsində SSRİ Nazirlər Soveti "Naftalan", "İstisu" kurortları və "Xəzərin qərb sahillərinin kurort zonasına çevrilməsi barədə" qərar qəbul etmişdi. Bundan sonra həmin ərazilərdə sağlamlıq ocaqları şəbəkəsinin tikintisi geniş miqyas aldı. 1983-cü ilin aprelində SSRİ Nazirlər Sovetinin "Xəzər dənizinin Azərbaycan SSR-ə aid sahillərində ümumittifaq əhəmiyyətli kurort zonası yaradılması haqqında" qərarı da ulu öndərin doğma vətənini kurortlar ölkəsi kimi görmək istəyinin məntiqi nəticəsi idi. Ümummilli liderin ölkəmizin kurort-sanatoriya şəbəkəsinin təkmilləşdirilməsi, əhalinin sağlamlığının qorunması ilə bağlı həyata keçirdiyi siyasət, bu gün Prezident İlham Əliyev tərəfindən uğurla davam etdirilir. Ölkə başçısının "Azərbaycan kurortları Dövlət Proqramı haqqında" 2007-ci il 27 fevral tarixli sərəncamı Həmkarlar İttifaqları sistemində kurortlar şəbəkəsinin inkişafına böyük təkan vermişdir. Ölkə ərazisində təbii müalicə ehtiyatlarının, müalicə-sağlamlaşdırma yerlərinin və kurortların öyrənilməsi, istifadəsi, inkişafı və mühafizəsi sahəsində yaranan münasibətləri tənzimləyən "Təbii müalicə ehtiyatları, müalicə sağlamlaşdırma yerləri və kurortlar haqqında" Azərbaycan Respublikası Qanununun təsdiqi və bu qanunun tətbiq edilməsi ilə bağlı Prezident İlham Əliyevin 2008-ci il mayın 7-də imzaladığı fərmana uyğun təbii müalicə ehtiyatlarından istifadə əsasında xəstələrin müalicəsi, profilaktikası və istirahətin təşkili "Günəşli" nevroloji sanatoriyasında uğurla həyata keçirilir. Sanatoriya yeni texnika və texnologiya ilə təchiz edilmişdir. Bu müəssisədə hər il yüzlərlə insan istirahət edir, bacarıqlı həkimlərin nəzarəti altında fiziki sağlamlıqlarını bərpa edə bilirlər. Sanatoriyada quraşdırılmış yeni avadanlıqlar xarici dövlətlərdə istehsal olunmuş, müasir dövrün tələblərinə cavab verə biləcək müalicəvi mahiyyətlidir. Sanatoriyada müalicənin effektliyinin artırılması üçün köklü islahatlar aparılıb. Belə ki, burada yeni müalicə aparatları alınaraq quraşdırılmış və xəstələrin müalicəsinin keyfiyyətinin yaxşılaşmasına nail olunmuşdur. Xəstələrin rahatlığını təmin etmək məqsədilə yataq korpusları günün tələbləri səviyyəsində təmir olunur. Belə ki, 1-ci yataq korpusunda aparılmış yenidənqurma və əsaslı təmir işlərindən sonra 55 çarpayılıq lüks tipli otaqlar yaradılmışdır. Burada aparılmış yenidənqurma işlərindən sonra bu korpusda yeni keyfiyyətli istilik sistemi qurulmuşdur. Bu sistemin normal, fasiləsiz işləməsi üçün 500 m-ə yaxın qaz xətti çəkilmişdir. Həkim və tibb bacılarının ixtisasının yüksəldilməsinə diqqət xeyli artırılmışdır. Sanatoriyanın inzibati bölməsi yeni təmir edilmiş korpusa köçürülmüşdür. Əvvəlki inzibati binada isə yeni diaqnostika mərkəzi yaradılmışdır. İstirahət edənlərin asudə vaxtlarının səmərəli təşkili məqsədilə maraqlı mədəni-kütləvi tədbirlər də keçirilir. Müntəzəm olaraq konsert proqramları, ziyarətgahlara, muzeylərə, tarixi yerlərə ekskursiyalar təşkil olunur. "Günəşli" sanatoriyası, əsasən, sinir sistemi və oynaq xəstəliklərinin müalicəsi üzrə ixtisaslaşmışdır. Nevroz, xronik bel-oma radikulitləri və onurğanın osteoxondrozlarından əziyyət çəkən xəstələr burada müalicə olunur, sağlamlıqlarını bərpa edirlər. Hazırda sanatoriyada 316 nəfər eyni vaxtda müalicə oluna bilər. Xəstələrin sağlamlığı keşiyində 9 həkim, 26 orta tibb işçisi durur. "Günəşli" sanatoriyasının baş həkimi Ağayarov Cabbar sanatoriyada dincələn hər bir fərdin istirahətinin düzgün qurulması, eləcə də, onlara tibbi müayinənin lazımi səviyyədə aparılması üçün bütün kollektivin gücünü səfərbər edib. Həkimlər həm fiziki, həm də mənəvi cəhətdən insanlara köməklik göstərir, onların sağlamlığının keşiyində dururlar. Bütün bu deyilənlərin təsdiqi olaraq sanatoriyada olduğum müddətdə mənə göstərilən diqqət və qayğı, müalicə metodları tam şəkildə fiziki cəhətdən sağlamlığıma müsbət təsirini göstərdi. Mən bu gözəl şəraitlə tanış oldum. Sanatoriyanın rəhbər və kollektivinin buraya gələn yaşlı və əlil şəxslərə göstərdikləri qayğı məni fərəhləndirdi. Dövlətimizin insanların sosial-rifah halının yaxşılaşdırılması istiqamətindəki fəaliyyət proqramının nəticələri bir vətəndaş olaraq məni qürurlandırdı. Mən "Günəşli" sanatoriyasının rəhbərliyinə, bütövlükdə birliyin direktoruna təşəkkürümü bildirirəm ki, əhaliyə belə xidmət göstərilir.

 

Səs.- 2008.- 4 dekabr.- S. 12.