Uşaq evlərinin sakinləri yaradıcılıq festivalında yarışıblar

Onlara mükafatlar təqdim edilib

Bakı şəhər Gənclər və İdman Baş İdarəsi tərəfindən "Bakı şəhərində yerləşən uşaq evlərinin uşaqları arasında 2-ci bədii-yaradıcılıq festivalı" keçirilib. Qeyd edək ki, bu festival prezident İlham Əliyevin 30 avqust 2005-ci il tarixli 982 saylı sərəncamı ilə təsdiq olunmuş "Azərbaycan Gəncliyi Dövlət Proqramı" (2005-2009-cu illər) 3.20-ci bəndində sosial müdafiəyə xüsusi ehtiyacı olan uşaq, yeniyetmə və gənclərin iştirakı ilə yaradıcılığın müxtəlif istiqamətləri üzrə müsabiqələrin və festivalların keçirilməsi məqsədi ilə təşkil olunub.

Gənclər və İdman Baş İdarəsi dövlət proqramının müvafiq bəndinə əsasən, müsabiqəni İnternat məktəbləri və Uşaq evlərinin sakinlərinin yaradıcılıq qabiliyyətlərini nümayiş etdirmək, istedadlı uşaqları üzə çıxarmaq, onlara dövlət qayğısını artırmaq və asudə vaxtlarını səmərəli təmin etmək, eyni zamanda, yeni ünsiyyət və əlaqələrin formalaşmasına şərait yaratmaq məqsədi ilə keçirib.

Qurumdan "Kaspi"yə bildirildiyinə görə, festival poeziya, musiqi, teatr, rəqs və musiqi alətlərində ifa nominasiyası kimi sahələri əhatə edib. Festivalın münsiflər heyətində tanınmış incəsənət xadimləri - rəqqas Kamil Dadaşov, Əməkdar artistlər Sənubər İsgəndərli, Aybəniz Haşımova, şair Vaqif Bəhmənli və professor Rəfiqə Mustafayeva təmsil olunublar.

Xatırladaq ki, festivalda Bakı şəhərində yerləşən 1, 2, 10, 11, 16 saylı İnternat məktəbləri, eyni zamanda 3 saylı Uşaq Evi, SOS Uşaq Kəndi, 39 saylı Uşaq Kardeorevmotoloyi dispanserin uşaqları iştirak ediblər. Münsiflər rəqs nominasiyası üzrə 1-ci yeri 3 uşaq evinin sakinləri arasında bölüblər. Festivalın ən kiçik iştirakçıları 1 saylı Uşaq Evinin müasir rəqs qrupu "Holli Dolli" rəqsi, 2 saylı Uşaq Evinin balaca sakinləri "Mimura" rəqsi və 3 saylı Uşaq Evinin sakinləri "Xan çobanı" rəqsi ilə 1-ci yerə layiq görülüblər. Ən çox alqış və münsiflər heyətinin rəğbətini qazanan 39 saylı Uşaq Kardeorevmotoloyi dispanserin sakinləri "Naz eləmə" rəqsi ilə Rəhimli Arzu və Hüseynov İbrahim olublar.

Mahnı nominasiyası üzrə 1-ci yer 1 saylı İnternat məktəbinin istedadlı sakini Akif İsgəndərova verildi. Teatr nominasiyası üzrə 1-ci yer 10 saylı İnternat məktəbinin qrupunun təqdim etdiyi "Parodiya" səhnəciyinə verildi. Musiqi alətlərində ifa nominasiyası üzrə ilk yeri 1 saylı Uşaq evinin sakini İsmayılov Ələsgər qazandı. O, ifasını saz alətində nümayiş etdirib. Yaddaqalan nömrə isə poeziya nominasiyası üzrə 1-ci yeri tutan 2 saylı Uşaq evinin sakini Vəliyeva Aygülün ifası oldu. O, C.Cabbarlının "Ana" şeirini söyləyib. Festivalın sonunda bütün iştirakçılar diplom və mükafatlarla qiymətləndiriliblər

Kaspi.- 2008.- 2 dekabr.- S. 16.