Əşrəf Heybətovun Bakıda sərgisi açılıb

Dünən Bakı Slavyan Universitetində (BSU) Almaniyada yaşayan azərbaycanlı rəssam Əşrəf Heybətovun sərgisi açılıb. Diaspora ilə İş üzrə Dövlət Komitəsinin, Alman-Azərbaycan Cəmiyyəti və Bakı Slavyan Universitetinin birgə təşkilatçılığı ilə açılan sərgi "Almaniya azərbaycanlı rəssamın gözü ilə" adı altında təşkil olunub. Sərgidə çıxış edən Azərbaycan Rəssamlar İttifaqının katibi Ağəli İbrahimov, Alman-Azərbaycan Cəmiyyətinin rəhbəri Çingiz Abdullayev, Diaspora ilə İş üzrə Dövlət Komitəsinin şobə müdiri İlham Məmmədov, BSU-nun rektoru Kamal Abdulla rəssamın çoxşaxəli yaradıcılığından söz açıblar. Tədbirdə iştirak edən Almaniyada yaşayan azərbaycanlı rəssam Əşrəf Heybətov isə sərgidə 40-a yaxın Almaniyaya həsr olunmuş əsərinin nümayiş olunduğunu deyib. Rəssam Azərbaycanda ikinci dəfə sərgisinin təşkil olunduğunu bildirib: "Mənim yaradıcılığımın çox hissəsi Azərbaycanla bağlıdır. Güman edirəm ki, həmin əsərlərimin də Azərbaycanda sərgisi təşkil olunacaq". Sərginin nümayişi dekabrın 19-na kimi davam edəcək.

Mərkəz.- 2008.- 16 dekabr.- S. 11.