Sultan M

Fırçanın dili ilə

Naxçıvan MR Rəssamlar Birliyinin Bəhruz Kəngərli adına sərgi salonunda Naxçıvan Dövlət Universitetinin İncəsənət fakültəsinin təsviri incəsənət ixtisasının tələbələrinin rəsm əsərlərindən ibarət sərgi açılmışdır.

Tədbirdə Naxçıvan MR Rəssamlar Birliyinin sədri, xalq rəssamı Hüseynqulu Əliyev çıxış edərək universitetin muxtar respublikamızda sənətşünaslıq nəzəri bazası rolunu oynadığını bildirdi. Xalq rəssamı qeyd etdi ki, bu sərgi tələbə rəssamlar arasında fitri istedada malik gənclərin çox olduğunu bir daha təsdiqləyir.

Universitetin rektoru, akademik İsa Həbibbəyli tələbə rəssamların bu cür sərgilər vasitəsilə tanıdılmasını təqdirəlayiq hesab etdi, gənclərə sənət uğurları arzuladı. Natiq vurğuladı ki, gələcəyin tanınmış rəssamları olacaq gənclərimizin professional sənət əsərləri sübut edir ki, Azərbaycan rəssamlıq sənətində Naxçıvan məktəbi formalaşmaqdadır.

Naxçıvan Dövlət Universitetin məzunu və müəllimi Həbibə Allahverdiya, Naxçıvan MR Mədəniyyət və turizm Nazirliyinin əməkdaşı, Naxçıvan MR əməkdar incəsənət xadimi Rəfael Kərimov sərgidə nümayiş olunan rəsmləri sənətkarlıq baxımından yüksək dəyərləndirdilər.

Əsərləri sərgilənən tələbələrdən Metexan Cangel və Rəfael Kərimov onlara göstərilən qayğıya və yaradılan şəraitə görə muxtar respublika və universitet rəhbərliyinə, sənət müəllimlərinə minnətdarlıqlarını bildirdilər.

Sonra sərgi ilə tanışlıq oldu. Tələbələrdən Canan Üstünün, Bəhruz Quliyevin, Məhərrəm Tahirovun, Fatimə Rükəmin, Ələkbər Ələkbərovun, Elay Məmmədovanın, Fizzə Quliyevanın əl işləri süjet və kompozisiya baxımından maraq doğurdu. Yağlı və suyu boya ilə natürmort, mənzərə, miniatür janrlarında çəkilmiş əsərlər tələbələrin bədii yaradıcılıq təxəyyülündən, peşəkarlıq səviyyəsindən, rənglər duyumundan soraq verirdi. Sərgidə universitetin müəllimlərindən Naxçıvan MR-in əməkdar rəssamı Ülviyyə Həmzəyevanın, Həbibə Allahverdiyevanın, Cavid Səfərovun əsərləri də nümayiş olundu.

İki sahil.- 2008.- 19 dekabr.- S. 11.