Günay

 

Dörd ölkə rejissorunun birgə layihəsi

 

“Ermənilərdən üzr istəyirəm” kampaniyasına kimlərin imza atıb atmadığına dair mübahisələrə əhəmiyyət verməyən bir gənc azəri rejissoru türk, erməni və gürcü həmkarları ilə birlikdə ortaq bir işə imza atıb.

Bir araya gələn gənc rejissorlar, İstanbul təəssüratlarını müştərək olaraq çəkdikləri bir sənədli filmdə əks etdirəcəklər. TRT ilə Fransa səfirliyinin birgə təşkil etdiyi bu layihədə ikisi Türkiyədən olmaqla beş rejissor iştirak edir. Ən maraqlı məqamlardan biri də ondadır ki, xarici rejissorlar İstanbula ilk dəfədir gəlirlər. Fransız rejissor Paul Saadoun rəhbərliyi ilə çəkilən televiziya sənədli yazısı üzərində müzakirələr aparan gənc rejissorlar, sənədli filmin çəkilişlərinə 2009-cu ilin bahar aylarında başlayacaq. Hər rejissorun özünəməxsus bir formada çəkdiyi İstanbul görüntüləri bir araya toplanacaq. Sonda isə "İstanbul" filmi meydana gələrək yayımlanacaq. Nəzərə çatdıraq ki, bu sahədə ilk olaraq iştirak edəcək rejissorlar Mari Qulbiyani (Gürcüstan), Asif Rüstəmov (Azərbaycan), Qor Bağdasaryan (Emnənistan), Ece Soydam (Türkiyə) və 5 ildir Türkiyədə yaşayan Bertrand Qlosetdir. Xatırladaq ki, gənc azəri rejissor, Moskvada Rüstəm İbrahimbəyovun kurslarını da bitirib. Axı, cənab İbrahimbəyovun ermənilərlə müştərək iş təcrübəsi çox zəngindir.

 

Paritet. -2008.- 23-24 dekabr.- S. 6.