Sumqayıtda Qubadlı Rayon Mədəniyyət və Turizm Şöbəsi üçün yeni bina istifadəyə verilmişdir

Sumqayıt şəhərində Heydər Əliyev Fondunun dəstəyi ilə Qubadlı Rayon Mədəniyyət və Turizm Şöbəsi üçün tikilmiş inzibati bina istifadəyə verilmişdir.

Bu münasibətlə keçirilən mərasimdə Qubadlı Rayon İcra Hakimiyyətinin başçısı Malik İsaqov, Mədəniyyət və Turizm Nazirliyinin, Qaçqınların və Məcburi Köçkünlərin İşləri üzrə Dövlət Komitəsinin nümayəndələri, rayon ağsaqqalları və ziyalıları çıxış etmişlər.

Natiqlər Heydər Əliyev Fondunun prezidenti, Milli Məclisin deputatı, YUNESKO və İSESKO-nun xoşməramlı səfiri Mehriban xanım Əliyevanın bu nəcib addımını yüksək qiymətləndirmiş, diqqət və qayğıya görə minnətdarlıqlarını bildirmişlər. Natiqlər mərasimin dekabrın 24-nə düşməsinin təsadüfi olmadığını vurğulamışlar. Qeyd etmişlər ki, Azərbaycan Prezidenti İlham Əliyevin doğum günü ilə əlaqədar açılış mərasimi əsl el şənliyinə çevrilmişdir. İstifadəyə verilən nəfis tərtibatlı bu mədəniyyət ocağı dövlətimizin, şəxsən ölkə başçısının mədəniyyətimizin inkişafına, məcburi köçkünlərin problemlərinin həllinə, onların həyat səviyyəsinin yüksəldilməsinə göstərdiyi diqqətin bariz nümunəsidir.

Yeni binada şöbə əməkdaşlarının normal fəaliyyəti üçün hər cür şərait yaradılmışdır. Rayon tarix-diyarşünaslıq muzeyi də burada yerləşəcəkdir.
Mərasim respublikanın tanınmış incəsənət ustalarının böyük konsert proqramı ilə davam etmişdir.

Xalq qəzeti.- 2008.- 25 dekabr.- S. 7.