Paytaxtımızda Misir filmləri həftəsi

Kinematoqrafçılar İttifaqında Bakıdakı Misir Mədəniyyət Mərkəzinin və Azərbaycan Mədəniyyət və Turizm Nazirliyinin təşkilatçılığı ilə Misir filmləri həftəsinə start verildi.

   Mərasimdə çıxış edən Misir Mədəniyyət Mərkəzinin direktoru, professor Adel Darviş qardaş ölkələrimiz arasında daha da güclənən mədəni əməkdaşlığı yüksək qiymətləndirdiyini bildirdi. O, 1935-ci ildə yaradılan Misir kinosunun tarixi ənənələrindən, hazırda bu ölkədə istehsal olunmuş 3 mindən çox filmi dünyanın rəğbətlə qarşılamasından danışdı.

   Azərbaycan Film Fondunun direktoru, əməkdar incəsənət xadimi Cəmil Quliyev Misir kinosunun şöhrətindən, Tofiq Saleh, Yusif Şahin kimi görkəmli rejissorların yaradıcılığından söhbət açmış, hər zaman olduğu kimi, bu dəfə də Misir filmləri həftəsinin Azərbaycanda rəğbətlə qarşılanacağına əminliyini vurğuladı.

  Həftə ərzində Misirdə istehsal olunmuş "Yuxusuz gecələr", "Taleh", "Yer kürəsi" və "Ceyran qanı" filmləri nümayiş etdiriləcəkdir. Ekran əsərlərinin nümayişi dekabrın 19-dək davam edəcəkdir. Tədbirin sonunda nümayiş etdirilən "Yuxusuz gecələr" filmi rəğbətlə qarşılandı.

Səs.- 2008.- 17 dekabr.- S. 1; 2.