Babayev V.

 

Retro-musiqi festivalının 3-cü turu yekunlaşdı

Qaliblər Rəşid Behbudov adına Dövlət Mahnı Teatrında mükafatlandırılacaqlar

Azərbaycan Həmkarlar İttifaqı Konfederasiyasının Azərbaycan Bəstəkarlar İttifaqı ilə birgə təşkil etdiyi УÖtən illərin mahnılarıФ retro-musiqi festivalının son turu başa çatıb. Bu günlərdə Bakının Bakıxanov qəsəbəsində yerləşən Adil İsgəndərov adına Mədəniyyət Sarayında yekunlaşan 3-cü tura Dövlət Neft Şirkətinin tabeliyində olan 8 mədəniyyət sarayını təmsil edən 15 iştirakçı qatılıb. Bu mərhələyə ümumilikdə 90 ifaçı keçmişdi. Xatırladaq ki, festivala ölkəmizin müxtəlif bölgələrini təmsil edən ifaçılar qatılıb. Onun təşkilində əsas məqsəd gənclərin zövqünü xalqımızın musiqi korifeylərinin yaradıcılığının ən yaxşı nümunələri ilə tərbiyələndirmək istedadlı gəncləri üzə çıxarmaqdır. İştirakçılar istedadlarını ötən illərdə yazılmış vətənpərvərlik əmək mövzusunda, həmçinin lirik mövzularda 3 mahnı oxumaqla nümayiş etdirdilər.

Müsabiqənin yekunlarına əsasən ARDNŞ-in Səttar Bəhlulzadə adına Mədəniyyət Sarayının solisti Zülfiyyə Məmmədova 1-ci, Adil İsgəndərov adına Mədəniyyət Sarayının solisti Rəcəb Musayev isə 3-cü yerə layiq görüldülər. Qeyd edək ki, Zülfiyyə 9 yaşından musiqi ilə məşğul olur. Amerika, Braziliya, Fransa da daxil olmaqla dünyanın 11 ölkəsində milli musiqimizi fərqli festivallarda təmsil etmiş qalibimizin Kanadada muğam ifalarından ibarət diski buraxılıb. Zülfiyyə həmcinin 2000-ci ildə Üzeyir Hacıbəyovun 115 illik yubileyinə həsr olunmuş muğam festivalında 1-ci yerin qalibi olub. 2005- ildə isə o, dahi bəstəkarın 120 illik yubileyinə həsr olunmuş muğam festivalında ilk onluğa düşərək, УdiplomatФ adına layiq görülüb.

Bəstəkarlar İttifaqının sədri, professor, xalq artisti Firəngiz Əlizadənin rəhbərlik etdiyi münsiflər heyətində Bakı Musiqi Akademiyasının (BMA) professoru Ramiz Zöhrabov, BMA-nın dosenti Zemfira Qafarova, əməkdar mədəniyyət işçiləri Elnarə Dadaşova və Tofiq Quluyev, Azərbaycan Dövlət Opera və Balet Teatrının baş rejissoru Hafiz Quliyev təmsil olunurdular.

Həmkarlar İttifaqı Konfederasiyasının mütəxəssisi Xoşqədəm Bağırovanın bildirdiyinə görə, festivalın qalibləri dekabrın 20-də Rəşid Behbudov adına Dövlət Mahnı Teatrında Dünya Azərbaycanlılarının Həmrəyliyi gününə həsr olunmuş tədbirdə çıxış edəcək və mükafatlandırılacaqlar.

Qeyd edək ki, 1-ci yerin qalibinə 400, 2-ci yerin qalibinə 300, 3-cü yerin qalibinə isə 200 manat pul mükafatı veriləcək.

İki sahil.- 2008.- 17 dekabr.- S. 8.