Karaoke çempionatında ən çox reytinq toplayan mahnılar bəlli oldu

Xəbər verdiyimiz kimi Bakıda karaoke üzrə dünya çempionatı çərçivəsində ilk müsabiqə keçirilir. Tədbir təşkilatçılarından olan Zaur Kamalın məlumatına görə, çempionat uğurlu keçir və bu, nəniki sadə adamların-canlı ifanın tərəfdarlarının, estrada ulduzlarının, incəsənət işçilərinin, idmançıların və biznes nümayəndələrinin iştirakı ilə məşhurlaşıb. Eyni zamanda, bir çox şirkətlərin bütöv bir komandaları ("Nestle", bp və s.) iştirak edirlər. Məlumatda bildirilir ki, bu günə kimi çempionatda 367 namizəddən seçilmiş 32 nəfər iştirak edir. Dünya çempionatının təşkilat komitəsinin şərtlərinə görə, qaliblər bu çempionatdan heç bir maddi gəlir əldə etməyəcəklər. Zaur Kamal onu da əlavə etdi ki, iştirakçıların seçimi davam edir və hər bazar ertəsi müxtəlif mahnı janrları üzrə turlar keçiriləcək. Dekabrın ilk günündə isə "Azərbaycan estradası" turu keçiriləcək. Çempionata dekabrın 30-da yekun vurulacaq. Qeyd edək ki, dünya çemponatının təşkilat komitəsinin şərtlərinə görə, Bakıda keçirilən çempionat çərçivəsində milli mükafat təsis olunub və bu "Xəzərin karaoke hiti" adlanır. Hansı ki, bu, karaoke ifaçılarının ifa etdiyi milli estradamızın ulduzlarının ən məşhur hitlərinə təqdim ediləcək. Təşkilat komitəsinin açıqlamasına görə iki həftə ərzində ən çox reytinq qazanan mahnılar bunlar olub. 1-ci yer Rəşid Behbudovun repertuarından "Sevgilim" mahnısı (bəstəkar Tofiq Quliyev), 2-ci yer "Röya Ayxanın repertuarından "Deyin ona" mahnısı, 3-cü yer Lalə Məmmədovanın repertuarından "Məktəb illəri" mahnısı (bəstəkar Aygün Səmədzadə). Xatırladaq ki, müsabiqənin münsiflər heyətində xalq artisti Yalçın Rzazadə, əməkdar incəsənət xadimi Baba Vəziroğlu, aranjimançı Yaşar Baxış, Mədəniyyət və Turizm İdarəsinin rəisi Əlikram Əliyev, "ŞFT" MMC-nin rəhbəri Fərhad Şabanovun "Stop klub"un rəhbəri Elçin Səmədov və Zaur Kamal təmsil olunurlar

.

Üç nöqtə.- 2008.- 2 dekabr.- S. 13.