“Karaoke”nin nominasiyalarının sayı artırılıb

Azərbaycanda keçirilən "Karaoke" müsabiqəsinin yekununa sayılı günlər qalır. Dekabrın 25-də finala start veriləcək. Dekabrın 30-da isə "Karaoke"yə yekun vuralacaq. Müsabiqənin baş prodüseri Zaur Kamalın bildirdiyinə görə, Karaoke üzrə Milli Təşkilat Komitəsi bu günlərdə iclas keçirib və Dünya Çempionatı Təşkilat Komitəsinin tələblərinə uyğun olaraq müsabiqənin qaydalarında dəyişiklik edilməsi ilə bağlı protokol tərtib edib. Çempionatın həmsədrləri xalq artisti Yalçın Rzazadə, əməkdar artist Baba Vəziroğlu, təşkilat komitəsinin üzvləri - aranjemançı Yaşar Baxış, dizayner-modelyer Səbinə Zülalova, "Stop" klubun direktoru Elçin Səmədov, "ŞFT" şirkətinin direktoru Fərhad Şabanov və Zaur Kamalın iştirakı ilə təşkilat məsələlərinə baxılıb və nominasiyaların sayının artırılması və çempionat medalları təsdiq olunub. Zaur Kamalın sözlərinə görə, müsabiqənin sonuncu turunda çempionat iştirakçılarına 12 nominasiya üzrə yarışmaq üçün azad seçim imkanı veriləcək. Nominasiyaların 6-dan 12-yə qaldırılması ilə əlaqədar pul prizləri ləğv olunub və yerdə qalan maliyyə vəsaiti əlavə 6 mükafatın hazırlanmasına sərf olunub. Qeyd edək ki, müsabiqə iştirakçıları "Ənənəvi Azərbaycan estadası", "Populyar Azərbaycan estradası", "Xarici estrada", "Rus estradası", "Akademik ifalar", "Qrup ifaları" nominasiyaları uğrunda yarışacaqlar. Müsabiqədə lirik və rəqs janrları olmaqla hər nominasiya üzrə 2 qalib müəyyən ediləcək.

Üç nöqtə.- 2008.- 18 dekabr.- S. 13.