Minskdə ilk
qala-konsert
Dekabrın 21-də Belarus Dövlət
Filarmoniyasının Böyük zalında Azərbaycan və
Belarus respublikalarının tanınmış
musiqiçilərinin iştirakı ilə ilk qala-konsert
keçiriləcək. Ölkəmizin Belarusdakı
səfirliyi və Belarus Dövlət Filarmoniyasının
birgə təşkilatçılığı ilə
"Hisslərin mifologiyası" adı altında tərtib
edilmiş konsert iki ölkənin diplomatik əlaqələrinin
15-ci ildönümünə və azərbaycanlıların
həmrəylik gününə həsr olunur. Konsertdə
iştirak edəcək beynəlxalq müsabiqələr laureatı
Əyyub Quliyevin verdiyi məlumata görə, layihənin
müəllifi Azərbaycanın Belarusdakı səfiri Əli
Nağıyevdir. Musiqili tədbirdə tarzən Ramiz Quliyev,
Belarusdan isə xalq artisti, Minsk filarmoniyasının direktoru
Vyaçeslav Bortnovski, pianoçu, beynəlxalq müsabiqələr
laureatı Pavel Netuk iştirak edəcəklər. Belarusun
ən tanınmış kollektivlərindən olan
Dövlət Akademik Simfonik Orkestrinin ifasında Azərbaycan
və Belarus bəstəkarları Qara Qarayev, Hacı
Xanməmmədov, O.Soninin əsərləri ifa olunacaq. Proqrama
həmçinin Mixail Qlinka, Pyotr Çaykovski və
K.Sen-Sansın da məşhur bəstələri daxil edilib.
Xalq cəbhəsi.- 2008.- 16 dekabr.- S. 13.