“Mən həmişə Bakıya qayıdacağam..."

Bu sözləri görkəmli həmyerlimiz Mstislav Rostropoviç deyirdi.
Dekabrın 9-da Bakıda Mstislav Rostropoviç adına II Beynəlxalq festival start götürmüşdür.

Festivalı Azərbaycan Respublikasının mədəniyyət və turizm naziri Əbülfəs Qarayev və festivalın bədii rəhbəri, Rostropoviç Fondunun prezidenti Olqa Rostropoviç açmışlar. Görkəmli maestronun qızı Olqa Rostropoviç musiqi bayramının açılışına gəlmiş bakılılara müraciətlə demişdir:

- Atam Bakını çox sevirdi. O, bu şəhərdə doğulmuş, uşaqlıq illərini burada keçirmişdir. Atam dünyanı gəzib-dolaşırdı, özünü dünyanın vətəndaşı hesab edirdi, amma tez-tez "Mən harada olsam, həmişə Bakıya qayıdacağam" deməyi xoşlayırdı. Çox istəyirdi ki, bu festival məhz burada, onun vətənində keçirilsin.

Mədəniyyət və Turizm naziri Əbülfəs Qarayev bildirmişdir ki, festival bir həftə davam edəcək. Keçən il olduğu kimi, bu dəfə də festivalda ABŞ, Rusiya, Fransa, İtaliya və Macarıstandan gəlmiş məşhur ifaçılar iştirak edəcəklər.

Festival Heydər Əliyev Fondu tərəfindən təşkil edilmişdir. Festivalın yüksək səviyyədə keçirilməsi üçün fondun prezidenti Mehriban xanım Əliyeva çox iş görmüşdür.

Təntənəli gecə Üzeyir Hacıbəyli adına Azərbaycan Dövlət Simfonik Orkestrinin ifasında Fikrət Əmirovun "Azərbaycan kapriççiosu" ilə başlandı. Orkestrin bədii rəhbəri və baş dirijoru Rauf Abdullayevdir. Fortepiano partiyasını Murad Adıgözəlzadə ifa edirdi.

Bir həftə davam edəcək festival müddətində musiqisevərlər "Moskovskiye solistı" kamera orkestrinin, Bakı uşaq simfonik orkestrinin, M.Rostropoviç Fondunun laureatlarının, Qalina Vişnevskayanın Opera İfaçılığı Mərkəzinin solistlərinin çıxışlarını dinləmək imkanı əldə edəcəklər.

Festival günlərindən biri - dekabrın 12-si Azərbaycan xalqının ümummilli lideri Heydər Əliyevin xatirəsinə həsr ediləcəkdir. Cüzeppe Verdi di Milano orkestri və xoru Verdinin "Rekviyem" əsərini ifa edəcəkdir.

Xatırladaq ki, Rostropoviç adına Beynəlxalq festival hər il dekabr ayında ölkəmizin paytaxtında keçiriləcəkdir.

Rostropoviç adına II Beynəlxalq festivalın açılışında Azərbaycan Respublikası Prezidentinin İcra Aparatının humanitar siyasət məsələləri şöbəsinin müdiri Fatma Abdullazadə iştirak etmişdir

Azərbaycan.- 2008.- 11 dekabr.- S. 7.