Məşhur musiqiçilər Bakıya toplaşıblar

Dekabrın 9-dan başlayaraq Bakıda II Beynəlxalq Rostropoviç Festivalı keçirilir. Tədbirdə bir çox ölkədən olan tanınmış musiqiçilər iştirak edirlər. Mədəniyyət və Turizm Nazirliyinin mətbuat katibi İntiqam Hümbətovun bildirdiyinə görə, beynəlxalq festivalda Ü.Hacıbəyov adına Azərbaycan Dövlət Simfonik Orkestri və Xalq artisti, professor Rauf Abdullayev, Rusiyanın Xalq artisti Yuri Başmetin rəhbərliyi ilə "Moskva solistləri" Kamera Orkestri, İtaliyadan tanınmış vokalçılar - Angela Kyara, Mario Malaqnini, Zayan Ath, Katarina Karneus, Rusiyanın tanınmış skripkaçısı və diriyoru Maksim Vengerov, Fransadan məşhur violonçel ifaçısı Xavyer Filips, Beynəlxalq müsabiqələr laureatı, Əməkdar artist Murad Adıgözəlzadə, görkəmli opera müğənniləri Makvala Kasraşvili, Badri Maysuradze, Qalina Vişnevskayanın Opera Mərkəzinin solistləri İrina Dubrovskaya və başqaları çıxış edirlər.

Qeyd edək ki, festival çərçivəsində Heydər Əliyev Sarayında İtaliyanın məşhur Cüzeppe Verdi di Milano Orkestri və Xorunun ifasında Cüzeppe Verdinin "Rekviyem" əsəri səslənəcək. Tədbir Heydər Əliyevin xatirəsinə həsr olunacaq. Bakıya səfər edən tanınmış sənətçilər Heydər Əliyev Sarayında dünya opera sənətinin klassikləri - Cüzeppe Verdi, Yory Bize, Cakkomo Puççini və Pyetro Maskanyinin opera səhnələrini ifa edəcəklər.

Xatırladaq ki, festivalda Rostropoviç Fondunun prezidenti, mərhum sənətkarın qızı Olqa Rostropoviç iştirak edir. Beynəlxalq tədbir Heydər Əliyev Fondunun, Mədəniyyət və Turizm Nazirliyinin və Rostropoviç Fondunun birgə təşkilatçılığı ilə keçirilir və dekabrın 14-nə kimi davam edəcək.

Kaspi.- 2008.- 11 dekabr.- S. 16.