Böyük musiqiçinin xatirəsinə həsr edilmiş konsert

Bakı sakinləri dünya şöhrətli həmyerlimiz Müslüm Maqomayevin vəfatının qırxıncı gününü böyük ehtiramla qeyd etdilər. Bu kədərli hadisə münasibətilə dekabrın 5-də keçirilmiş görüşün iştirakçıları Azərbaycan xalqının sədaqətli oğlu, öz böyük sənətini bizə miras qoyub getmiş musiqiçi haqqında ürək sözlərini söylədilər.

Dekabrın 7-də isə M.Maqomayev adına Azərbaycan Dövlət Filarmoniyasında unudulmaz həmyerlimiz, əfsanəvi mügənni və bəstəkar Müslüm Maqomayevin xatirəsinə həsr edilmiş konsert oldu. O axşam Bakı Filarmoniyasına gələnlərin hər biri sanki Müslümlə görüşə gedirdi.
Əslində belə düşünməyə əsas vardı: Müslüm filarmoniyanın foyesindəki portretlərdən, səhnə meydançasında quraşdırılmış ekranda nümayiş etdirilən kadrlardan boylanaraq sanki hamını salamlayırdı. Ekranda isə bir vaxtlar bütün sənətsevərlərin həyatına parlaq ulduz kimi daxil olmuş bu planetar miqyaslı mügənninin çıxışlarından fraqmentlər göstərilirdi. Müslümün bənzərsiz ifasında operalardan ariyalar, romanslar, mahnılar səslənir, kadr arxasında isə bu qeyri-ordinar insanın bioqrafiyası ilə bağlı faktlar barədə məlumat verilirdi.

Konsertin əvvəlində Azərbaycanın xalq artisti, dirijor Rauf Abdullayevin rəhbərliyi ilə Üzeyir Hacıbəyli adına Azərbaycan Dövlət simfonik orkestrinin ifasında “Şah İsmayıl” operasının əzəmətli uvertürası səsləndi. Soltan Hacıbəyovun simfonik əsəri, Qara Qarayevin “Don Kixot” simfonik qravürlərindən fraqmentlər, M.Maqomayevin “Marş” əsəri xatirə gecəsinə gələnlərin qəlbini riqqətə gətirirdi. Sonra orkestr dirijor Fəxrəddin Kərimovun rəhbərliyi ilə Rossininin məşhur “Seviliya bərbəri” operasının uvertürasını ifa etdi. Anım gecəsinin həsr edildiyi insanla müəyyən mənada bağlı olan bu əsərlərin hər biri böyük sənətçinin və onun sənətinin pərəstişkarlarının ovqatına uyğun idi.
Daha sonra xorun ifasında unudulmaz Müslümü şöhrətləndirmiş “Alliluyya”, lap sonda isə böyük sənətçının ifasında onun şah əsəri sayılmağa layiq olan “Azərbaycan” mahnısı səsləndi. Müslüm bu mahnıda Vətənə hədsiz sevgisini tərənnüm etmişdir.

Filarmoniyanın foyesində Müslüm Maqomayevə - xatirəsi qəlbimizdə əbədi yaşayacaq unudulmaz həmyerlimizə həsr edilmiş fotosərgi açılmışdi

Xalq qəzeti.- 2008.- 11 dekabr.- S. 13.