Müslüm Maqomayev ölməzdir, onun sənəti əbədidir

Vaxt yaman sürətlə keçir. Azərbaycan xalqının görkəmli oğlu, zəmanəmizin dünyaşöhrətli və hamının sevimlisi olan musiqi xadimi, müğənni və bəstəkar, Azərbaycanın və SSRİ-nin xalq artisti Müslüm Məhəmməd oğlu Maqomayevin vəfatından qırx gün keçdi... Düz qırx gün...

Bu əfsanəvi azərbaycanlı ilə əvvəlcə Moskvada, sonra isə doğma Vətəni Bakıda vida mərasimi sanki lap yaxın vaxtlarda olmuşdu. Azərbaycan Respublikasının Prezidenti İlham Əliyevin şəxsi səyləri və təşəbbüsü sayəsində Müslüm Maqomayev Bakıda torpağa tapşırıldı.

Müslümü və onun bənzərsiz sənətini sevənlərin, bu gözəl insanla bir dövrdə yaşadıqlarına görə fəxr edənlərin hamısı onu son mənzilə yola saldı. Vida və dəfn mərasimində ölkəmizin Prezidenti də iştirak etmişdi.
Müslüm Maqomayev öz xalqına, doğma yurda bütün varlığı ilə, saysız-hesabsız tellərlə sıx bağlı olan əsl vətənpərvər idi. Buna ən parlaq sübutlardan biri onun unudulmaz, misilsiz Azərbaycan mahnısıdır. Planetimizin bütün guşələrində verdiyi konsertləri çox vaxt bu mahnı ilə başlayır və ya onunla tamamlayırdı. Buna görə də sənətkarın qırxının onun çox sevdiyi doğma Bakıda qeyd edilməsi tamamilə təbiidir.

..."Muğam" klubunda böyük həmyerlimizin xatirəsinə həsr edilmiş görüşə tanınmış mədəniyyət və elm xadimləri, Azərbaycanın görkəmli ictimai xadimləri, xarici ölkələrin səfirləri gəlmişdi. Müslüm Maqomayevin bənzərsiz ifasında onun son lent yazıları - operalardan ariyalar, romanslar, mahnılar səslənirdi. Divarlardan asılmış portretlərdən isə müğənni özü baxırdı - gözəl, təbəssümlü Müslüm...

Müslüm Maqomayevin sədaqətli ömür-gün yoldaşı, görkəmli müğənni Tamara Sinyavskaya, Rusiya ziyalılarının bir qrup nümayəndəsi - məşhur həmvətənimizin dostları və həmkarları anma mərasimində iştirak etmək üçün Bakıya gəlmişdilər. Görüşü Müslümün yaxın dostu, Azərbaycanın xalq artisti, kinorejissor Eldar Quliyev açdı. O dedi ki, Müslüm haqqında keçmiş zamanda danışmaq olmaz. Müslüm dünən də vardı, bu gün də var və onun səsi, sənəti yaşadıqca, özü də həmişə yaşayacaqdır. Müslümün sənəti isə əbədidir!

Azərbaycan Prezidentinin İcra Aparatının şöbə müdiri Fatma xanım Abdullazadə də səmimi və emosional çıxışında bu fikri təsdiqlədi. O dedi ki, Müslüm Maqomayev bizim hər birimizin qəlbində yaşayır və hər kəs öz Müslümünü xatırlayacaqdır. Bu nurlu insan bizim hamımıza o qədər hərarət, o qədər müsbət enerji bəxş etmişdir ki, insanlar Maqomayevin musiqi dünyasına daldıqda hökmən əvvəlkindən yaxşı olmalıdırlar.

Görüşdə çıxış edən mədəniyyət və turizm naziri Əbülfəs Qarayev, Rəssamlar İttifaqının sədri Fərhad Xəlilov, Azərbaycan Milli Elmlər Akademiyasının prezidenti Mahmud Kərimov və başqaları Müslümün öz Vətəninə bağlılığını xüsusi vurğuladılar. Bəli, Müslüm Maqomayev və Azərbaycan bir-birindən ayrılmazdır! Ə.Qarayev Müslüm Maqomayevin burada, doğma torpağımızda dəfn olunmasına görə Azərbaycan Prezidenti İlham Əliyevə dərin təşəkkürünü bildirdi. Axı, hamımızın yadındadır ki, Müslüm hətta Rusiya Prezidentinin ona təqdim etdiyi ordeni alanda da fəxrlə demişdi: "Mən azərbaycanlıyam!"

Anma mərasimində iştirak edən Rusiyanın Bakıdakı səfiri Vasili İstratov qeyd etdi ki, Müslüm Maqomayev təkcə Rusiya ilə Azərbaycanı deyil, vaxtilə ümumi vətənimiz olmuş Sovetlər İttifaqı məkanındakı bütün ölkələri və xalqları birləşdirir. Məgər burada keçmiş İttifaqın bütün ölkələrinin səfirlərinin iştirak etməsi buna dəlalət etmirmi?!

Müslüm barədə xatirələrdə onun insani keyfiyyətlərinə dərin hörmət duyulurdu. O, adı böyük hərflə yazılan İnsan idi. Ulu Tanrı ona çox istedadlar bəxş etmişdi: böyük musiqiçi həm də vəfalı Dost, əsl Kişi, səmimi, xeyirxah, ədalətli və təmiz adam idi. Bu sözləri dünya şöhrətli müğənni Yelena Obraztsova və çıxış edənlərin hamısı vurğuladı.
Bir tərəfdən kədərli duyğular oyadan, digər tərəfdən hamımızın, həqiqətən, nurlu insan kimi tanıdığımız Müslümün xatirəsinin işıq saldığı bu mərasimdə səslənən bütün sözlər öz böyük sənətini bizə miras qoyub getmiş insana məhəbbət və minnətdarlıq ifadəsi idi.

Sonda Maqomayevin həyat yoldaşı Tamara Sinyavskaya Müslümün xatirəsinə bəslədikləri ehtirama görə hamıya təşəkkür etdi, Azərbaycan dövlətinin başçısına xüsusi təşəkkürünü bildirdi.

Azərbaycan.- 2008.- 6 dekabr.- S. 5.