Müslüm Maqomayevin fanın qırxın günü qeyd olundu

 

Müğənninin bənzərsiz ifasından olan ariyalar, romanslar, mahnılar səsləndirildi

 

Dünya şöhrətli müğənni Müslüm Maqomayevin vəfatının 40-cı günü münasibətilə dekabrın 7-də M.Maqomayev adına Azərbaycan Dövlət Filarmoniyasında onun xatirəsinə həsr edilmiş konsert keçirildi. Konsertə gələnlər filarmoniyanın foyesində hazırlanmış Müslüm Maqomayevin portretləri ilə bir daha tanış oldular.

Eyni zamanda, səhnə meydançasında quraşdırılmış ekranda nümayiş etdirilən kadrlardan Müslüm Maqomayev boylanaraq sanki hamını salamlayırdı. Ekranda isə bir vaxtlar bütün sənətsevərlərin həyatına parlaq ulduz kimi daxil olmuş bu planetar miqyaslı müğənninin çıxışlarından fraqmentlər göstərilirdi. Müslümün bənzərsiz ifasında operalardan ariyalar, romanslar, mahnılar səslənir, kadr arxasında isə bu qeyri-ordinar insanın bioqrafiyası ilə bağlı faktlar barədə məlumat verilirdi. Konsertin əvvəlində Azərbaycanın xalq artisti, dirijor Rauf Abdullayevin rəhbərliyi ilə Üzeyir Hacıbəyov adına Azərbaycan Dövlət simfonik orkestrinin ifasında "Şah İsmayıl" operasının əzəmətli uvertürası səsləndi. Soltan Hacıbəyovun simfonik əsəri, Qara Qarayevin "Don Kixot" simfonik qravürlərindən fraqmentlər, M.Maqomayevin "Marş" əsəri xatirə gecəsinə gələnlərin qəlbini riqqətə gətirirdi. Sonra orkestr dirijor Fəxrəddin Kərimovun rəhbərliyi ilə Rossininin məşhur "Seviliya bərbəri" operasının uvertürasını ifa etdi. Anım gecəsinin həsr edildiyi insanla müəyyən mənada bağlı olan bu əsərlərin hər biri böyük sənətçinin onun sənətinin pərəstişkarlarının ovqatına uyğun idi. Daha sonra xorun ifasında unudulmaz Müslümü şöhrətləndirmiş "Alliluyya", lap sonda isə böyük sənətçının ifasında onun şah əsəri sayılmağa layiq olan "Azərbaycan" mahnısı səsləndi. Dinləyicilər bir daha yəqin etdilər ki, Müslüm bu mahnıda Vətənə hədsiz sevgisini tərənnüm etmişdir. Filarmoniyanın foyesində xatirəsi qəlbimizdə əbədi yaşayacaq unudulmaz həmyerlimizə Müslüm Maqomayevə həsr edilmiş fotosərgi açılmışdır.

 

Səs.- 2008.- 11 dekabr.- S. 14.