Günay

 

Milyonçu oğlu və istedadlı sənət adamı

 

Fərəc Nağıyev yad edildi

 

Bir həqiqət var ki, insan ömrünə oldu öldü kəlmələri qərar verir. Ancaq hər bir insanın əməlləri əbədi olaraq qalır. Öz əməlləri ilə, sənəti ilə həyatı zənginləşdirən insanlardan biri də rejissor, aktyor və gülüş ustası, milyonçu Ağa Musa Nağıyevin oğlu Fərəc Nağıyevdir. O, yaşadığı illər boyu vətəninə, xalqına və millətinə bağlı bir insan olub. Bu dediklərimizə əyani sübut olaraq onun 200 satirik şeirinə və tərtib etdiyi afişalara nəzər salmaq kifayət edər.

Ötən gün Xətai Rayon Mədəniyyət Mərkəzinin təşkilatçılığı ilə F.Nağıyevin 105 illik yubileyi ilə əlaqədar yubiley tədbiri keçirildi. Tələbələri, sənət dostları tamaşaçılara F.Nağıyevin ssenari müəllifi olduğu qədim xalq meydan oyunları "Qaravəlli"dən parçalar təqdim etdilər.

Atası haqqında təəssüratlarını bizimlə bölüşən qızı Dilarə Nağıyeva bildirdi ki, atası səhnə fədaisi, teatrın banisi və incəsənətin fanatı olub: "Atam milyonçu vərəsəsi olmasına baxmayaraq, adının mənası kimi həyatı da kədərdən sevincə doğru yönəlib".

Atasının yaradıcılığının çoxşaxəli olduğunu deyən D.Nağıyeva bildirdi ki, o vaxtlar atasının sənətinə mətbuat vasitəsiylə qiymət verilir və orda bu fikirlər səslənib:" Fərəc əminin sevinməyə ixtiyarı var. Ssenari müəllifi, maskalar, məzhəkəli kupletlər - bütün bunlar onun qəlbidir, zəhmətinin bəhrəsidir, bilik və təcrübəsidir və bütövlükdə ürəyidir". Dağıstanda , Orta Asiyada, eləcə də Azərbaycanın bütün ucqar rayonlarında teatrın təşkilində və təbliğində rolunun əvəzsiz olduğunu deyən qızı Solmaz Nağıyeva isə bildirdi ki, atasının 69 yaşında "Kosa" rolunda çıxış etməsi hər kəsi heyrətə salıb.

Bu günün onu 60-70-ci illərə qaytardığını deyən Fərəc müəllimin tələbəsi Zeynal Kərimov bildirdi ki, sənətkarın yaratdığı "Qaravəlli" teatrı bu gün də öz aktuallığını saxlayıb: "Hətta böyük teatra onun yaradıcılığı yol açıb. Milli Dram Teatrında görkəmli dramaturqumuz Mirzə Fətəli Axundovun "Xırs quldurbasan" əsəri əsasında səhənələşdirilən tamaşaya o, istedalı rejissor Adil İsgəndərovun təklifi ilə həmin tamaşaya proloq və epiloq yazır".

Fərəc Nağıyev 1903-cü ildə dünyaya göz açıb. O hələ kiçik yaşlarında səhnə ilə maraqlanır. 18 yaşında isə Nağıyev gələcək həyatını bütövlükdə teatr sənətinə həsr edəcəyini qərar verir. Teatr Texnikumuna daxil olan F.Nağıyev orda aktyor, rejissor və rəssamlıq ixtisaslarına yiyələnir.

İlk addımlarını 1921-ci ildə "Satirikon" teatrında atan F.Nağıyev, 1921-28-ci illərdə Milli teatrın tamaşalarında baş rolların ifaçısına çevrilir. 1929-cu ildə "Səyyar kəndli", 1930-cu ildə Türk işçi teatrlarında çalışır. Quba, Sabirabad, Neftçala və Salyanda teatr sənətinin inkişafında böyük rol oynamış F.Nağıyev, Dərbənd Dram Teatrının təməl daşını qoyub, tearın direktoru olmaqla bərabər, baş rejissor və bədii rəhbər vəzifələrini icra edib. Bununla yanaşı o, işlədiyi teatrlarda afişaların və proqramların tərtibi ilə də məşğul olub.

 

Paritet.- 2008.- 6-10 dekabr.- S. 8.