Azərbaycanın mədəniyyət turizm naziri Avropa Şurasının üzvü olan ölkələrin mədəniyyət nazirlərinin konfransında iştirak edən nümayəndə heyətlərinin başçıları ilə görüşmüşdür

 

Azərbaycanın mədəniyyət və turizm naziri Əbülfəs Qarayev Avropa Şurasının üzvü olan ölkələrin mədəniyyət nazirlərinin konfransı çərçivəsində Polşanın mədəniyyət naziri Boqdan Zdrayevski, Misirin mədəniyyət naziri Hüsni Fərux və ABŞ dövlət katibi köməkçisinin müavini Alina Romanovski ilə görüşmüşdür. Görüşlərdə konfransın yüksək səviyyədə təşkil olunduğu bildirilərək vurğulanmışdır ki, Bakı forumu mədəniyyətlər arasında dialoqun inkişafına töhfə verəcəkdir.

Əbülfəs Qarayev konfransda iştirak etdiklərinə görə nümayəndə heyətlərinin başçılarına təşəkkür edərək əmin olduğunu bildirmişdir ki, forum çərçivəsində keçirilən görüşlər və diskussiyalar dünyada mədəniyyətlərarası dialoqun fəallaşdırılması istiqamətində atılan daha bir addım olacaqdır.

Nazir Bakı ilə Qahirə arasında birbaşa təyyarə reysinin açılmasının əhəmiyyətini diqqətə çatdıraraq demişdir ki, bu, ölkələrimiz arasında əlaqələrin möhkəmləndirilməsinə kömək edəcəkdir. O, konfransda iştirak edən mədəniyyət xadimlərini Bakıda təşkil olunan festivallarda, sərgilərdə digər mədəni tədbirlərdə iştiraka dəvət etmişdir.

Konfrans çərçivəsində mədəniyyət və turizm naziri Əbülfəs Qarayev Azərbaycan hökuməti adından Avropada memarlıq irsinin mühafizəsi haqqında Konvensiyanı imzalamışdır.

Sənədin imzalanma mərasimində Avropa Şurasının Baş katibi Terri Devis iştirak etmişdir.

İSESKO-nun baş direktoru Əbdüləziz bin Osman əl-Tuveycri və Azərbaycanın mədəniyyət və turizm naziri Əbülfəs Qarayev islam ölkələri mədəniyyət nazirlərinin 6-cı konfransına hazırlıq barədə saziş imzalamışlar. Əbülfəs Qarayev bildirmişdir ki, Azərbaycan bu konfransda Avropanın 10 ölkəsinin iştirakı ilə bağlı Avropa Şurasına müraciət göndərmişdir.

Həmin gün Azərbaycan və Slovakiya mədəniyyət nazirlikləri arasında əməkdaşlığa dair saziş imzalanmışdır. Slovakiya tərəfindən sənədi bu ölkənin mədəniyyət nazirinin müavini Cozef Lanq imzalamışdır.

 

Xalq qəzeti.- 2008.- 4 dekabr.- S. 3.