Elməddin

 

Ermənistan mədəniyyətlərarası dialoqdan qaçıb

 

Parisdə keçirilən müzakirələrdə Bakıda qəbul olunmuş bəyannamə yüksək qiymətləndirilib

 

Parisdə Avropa Şurası Parlament Assambleyası (AŞPA) Mədəniyyət, Elm və Təhsil Komitəsinin qış sessiyası ərəfəsində son toplantısı keçirilib. İclasda "Avropada müəlliflik hüquqları", "Ən yaxşı Avropa muzeyi mükafatı", "Avropada sərhədsiz elektron mətbuat" mövzularında müzakirələr zamanı AŞPA-dakı Azərbaycan daimi nümayəndə heyətinin üzvü Rəfael Hüseynov həmin məsələlərə öz münasibətini bildirib. Milli Məclisin deputatı R.Hüseynov həmin mötəbər mərasimdə Avropa Şurasının təmsilçisi olaraq iştirak edib.

Dekabrın 2-3-də Bakıda keçirilmiş "Mədəniyyətlərarası dialoq Avropa və ona qonşu regionlarda davamlı inkişafın və sülhün əsasıdır" mövzusunda Avropa Şurasına üzv olan ölkələrin mədəniyyət nazirlərinin beynəlxalq konfransı ilə bağlı hesabat məruzəsi dinlənilərkən azərbaycanlı deputat komitə iclasında çıxış edib. O bildirib ki, quruma üzv dövlətlərin mədəniyyət nazirlərinin Bakı konfransı mədəniyyətlərarası dialoq problemi üzrə indiyədək keçirilmiş bütün bu qəbil toplantılardan həm miqyasına, həm mövzularının əhatə dairəsinə görə seçilir. Bakı konfransında Avropa Şurasına üzv olan ölkələrdən başqa, bir sıra Şərq dövlətlərindən mədəniyyətə məsul olan yüksək vəzifəli nümayəndələr iştirak edib. 48 ölkədən gəlmiş nazirlər, nazir müavinləri, sənət xadimləri, mütəxəssislərdən başqa, 10 beynəlxalq təşkilat, o cümlədən YUNESKO, İSESKO, Ərəb Dövlətləri Liqası, ALESKO da bu konfransda ən yüksək səviyyədə təmsil olunub. Avropa Şurasının üzvü olan ölkələr arasında yalnız Ermənistan bu toplantıya gəlməyib. Azərbaycanlı deputat bəyan edib ki, AŞ-nin baş katibi Terri Devis bundan təəssüflənib, Ermənistanın özünü bu layihədən kənarda qoymasını anlaşma yaxınlaşmaya mane olan hərəkət kimi dəyərləndirib.

R.Hüseynovun bu məlumatı komitə üzvlərində də təəssüf hissi doğurub. Bu hal Ermənistanın mədəniyyətlərarası dialoqdan qaçması kimi qəbul edilib.

Avropa Şurasına üzv dövlətlərin mədəniyyət nazirləri toplantısının Bakıda ən yüksək səviyyədə təşkil edildiyini xüsusi vurğulayan Rəfael Hüseynov, bu tədbirin Avropa Şurası ilə Azərbaycan arasında əlaqələrin inkişafının, Azərbaycanın bu qurumda getdikcə daha artıq nüfuz qazandığının göstəricisi olduğunu qeyd edib.

Bakı konfransında qəbul edilmiş bəyannaməyə toxunan R.Hüseynov deyib ki, mədəniyyətlər və dinlərarası dialoq problemi Avropa Şurasında son bir neçə ildə daimi müzakirə mövzusu olsa da, ilk dəfədir bu mövzuda beynəlxalq əhəmiyyətli bir sənəd qəbul edilib.

Həmin sənədin ikinci mühüm cəhəti ondan ibarətdir ki, indiyədək mədəniyyətlərarası dialoq məsələsi ilə bağlı yalnız nəzəri aspektdə söhbətlər gedirdisə, Bakı bəyannaməsi ilk dəfə bu istiqamətdə praktiki işlərlə bağlı konkret vəzifələr müəyyən edir: "Gələcəkdə mədəniyyətlərarası dialoq mövzusu ilə əlaqədar qəbul ediləcək istənilən sənəd üçün Bakı bəyannaməsi başlıca istinad mənbəyinə çevriləcək".

AŞPA-nın Mədəniyyət, Elm və Təhsil Komitəsi deputat Rəfael Hüseynovun məruzəsini yüksək qiymətləndirib, mədəniyyət nazirlərinin Bakı konfransının Azərbaycanın mədəniyyətlərarası dialoqun tərəqqisinə layiqli töhfəsi olduğunu təsdiq edib.

 

Üç nöqtə.- 2008.- 12 dekabr.- S. 9.