Vəfalı T.

Muğam parkı unudulub

Paytaxtdakı əksər parkların, bağların, meydançaların və ümumi istifadə olunan digər obyektlərin baxımsızlıq və nəzarətsizlik üzündən acınacaqlı duruma düşməsi adi hala çevrilib. Belə obyektlərdən biri də Nəsimi rayonundakı keçmiş "Bakı" mehmanxanası ilə üzbəüzdo yerləşən "Muğam" parkıdır. Qeyd edək ki, ilbəil bərbad hala düşən obyektdə yaşanan problemlərlə əlaqədar yerli sakinlər dəfələrlə aidiyyəti qurumlara müraciət etsələr də, məkanda hələ də müsbət dəyişiklik nəzərə çarpmır. Son günlər isə "Muğam"ın ərazisinin müəyyən şəxslərə satılması və orada tikinti işlərinə start verilməsi barədə məlumatlar yayılıb.

Deyilənləri dəqiqləşdirmək üçün dünən həmin əraziyə baş çəkib adıçəkilən parkla bağlı reportaj hazırlamaq qərarına gəldik.

Təxminən 3-4 hektara qədər sahəni əhatələyən obyektin girişində quraşdırılmış nov nəzarətsiz qaldığından oradan axan su ətrafda xırda gölməçələr yaradıb. Hətta novdan yüksək sürətlə və hündürlüyə qalxan su şose yola doğru axır. Parkda müxtəlif zibillərə, tör-töküntülərə də rast gəldik. Orada quraşdırılmış skamyaların kənarlarında çəkilmiş siqaret kötükləri və çırtlanmış tumların qabıqları əməlli-başlı zibillik və antisanitariya yaradıb. Obyektdə quraşdırılmış 10-a qədər işıqlandırma dirəyinin heç biri salamat deyildi. Onlardan bəzilərinin lampaları və şüşəli çərçivələri, eləcə də elektrik xətləri tamam yararsız hala salınıb. Bu səbəbdən axşamlar parka zülmət qaranlıq çökür. Onu da bildirək ki, parka ziyarətə gələnlərin istirahətlərinin xoş keçməsi üçün hələ bir neçə il öncə elektrik dirəklərinin yeniləri ilə əvəzlənməsi ilə yanaşı, parkın son hissəsində fəvvarə, onun yanında isə musiqi mərkəzi salınıb.

Fəvvarə 3 ildir susur...

Əvvəllər sözügedən mərkəzdə xoş musiqilər səsləndirilirdi ki, bu da parkdakıların ovqatına, əhval-ruhiyyəsinə müsbət təsir edirdi.

Ancaq son 3 ilə yaxındır haqqında söhbət açılan fəvvarə baxımsızlıq üzündən tamam dağılıb-gedir, oradakı dəmir su boruları nəmişlikdən tamam paslanaraq çürüyüb. Bundan başqa, qeyd etdiyimiz musiqi mərkəzinin yerləşdiyi yeraltı kabinetin qapısı da xeyli müddətdir bağlı qalıb.

Parkın orta hissəsində Nəsimi rayon Qaz İstismarı İdarəsinə məxsus 15 saylı qaztənzimləmə məntəqəsinin və Nəsimi rayon Polis İdarəsinin 22-ci polis bölməsinin 44 saylı sahə müvəkkilliyinin yerləşdiyi 1 mərtəbəli 2 otaqlı binanın arxa və sağ tərəflərində divar suvaqları və kirəmit hissələri sökülmüşdü. Obyektin sol və qabaq hissələrində isə analoji proses davam etdirilirdi. Tikinti materialları və tullantı əşyaları isə binanın kənarlarına atılmışdı. Binanın arxa hissəsində həmçinin yeni otaqların tikintisinə başlanılmışdı. Fəhlələr yan divarları hörülmüş otağın orta hissəsində arakəsmə bəndlərini qururdular.

Adıçəkilən məntəqədə çalışan operatorlardan öyrəndik ki, qurumun yerləşdiyi 1 otağın xarici konstruksiyasına dəyişikliklər ediləcək: "Çünki gördüyünüz bu binanın məntəqəmizə aid olan hissəsində yerləşən avadanlıqlar və qurğular vasitəsilə Nəsimi rayonunun böyük bir ərazisinin qazla təchizatı həyata keçirilir. Bura 300 millimetrlik qaz kəmərləri çəkilib. Onların hesabına rayonumuzun Neftçilər xəstəxanasından tutmuş Bakı Dəniz Vağzalının ətrafında, eləcə də "Azdrama"nın, "5 mərtəbə" adlanan məkanın yanında yerləşən bütün evləri qazla təmin edirik. Bu səbəbdən də buranın sökülməsi, yaxud köçürülməsi mümkünsüzdür. Ancaq bununla belə, yerləşdiyimiz bina uzun illərdir istismardadır və əsaslı təmir olunmadığından yararsız hala düşüb. Onun təmirinə ehtiyac yarandığı üçün müəyyən işlər görüləcək".

Müvəkkillik sahə rəisliyi ilə əvəzlənəcək

Müsahiblərimiz dedilər ki, sözügedən prosesin aparılması əsasən 44 saylı sahə müvəkkilliyinin ərazisinin genişləndirilməsindən irəli gəlib: "Nazir Ramil Usubov göstəriş verib ki, respublikanın daxili işlər orqanlarının fəaliyyətini Avropa standartlarına müvafiq tənzimləmək hökmən vacib olduğu üçün bir sıra tədbirlərin həyata keçirilməsi lazımdır. Belə tədbirlərdən biri də sahə müvəkkilliklərinin ləğv edilməsi və onların əvəzinə sahə rəisliklərinin yaradılmasıdır. Buna görə də buradakı sahə rnüvəkkilliyinin otağı tamam sökülüb. Onun yerində əvvəlkindən xeyli böyük və sahəsi 40 kvadratmetr olan yeni otaq tikilir. Eşitdiyimizə görə, artıq paytaxtdakı sahə müvəkkilliklərindən yalnız Nərimanov rayonunda fəaliyyət göstərənlərindən biri sahə rəisliyinə çevrilib. Digərlərinin də analoji mərhələ keçməsi üçün lazımi addımların atılmasına başlanılacaq".

Məkana yiyə duran tapılmadı

Parkın daimi "qonaq"larından olduğunu öyrəndiyimiz bir neçə ağsaqqal ürəkağrısı ilə obyektin sahibsiz qalmasından gileyləndi.

Onların dediyinə görə, məkanın gah Nəsimi rayon bələdiyyəsinin, gah da Bakı şəhər Yaşıllaşdırma Departamentinin (BŞYD) balansında olduğu söylənilsə də, adıçəkilən qurumlar parkжт taleyinə barmaqarası baxırlar. Bu səbəbdən də tam nəzarətsiz qalmış istirahət mərkəzinin durumu günbəgün ağırlaşır.

Məsələylə əlaqədar aidiyyəti qurumlarla da əlaqə saxladıq. BŞYD rəsmiləri dedilər ki, parkın departamentə heç bir aidiyyəti yoxdur. Bu səbəbdən də onlara dəxli olmayan obyektlərdə baş verən xoşagəlməz hadisələrə görə məsuliyyət və cavabdehlik daşımaq fıkrində deyillər.

Nəsimi rayon bələdiyyəsinin əməkdaşları da istirahət mərkəzinin onların tabeliyində olmadığını vurğuladılar.

Nəsimi rayon İcra Hakimiyyətindən suallarımızı Nəsimi rayon Mənzil-Kommunal Təsərrüfatı Birliyinə ünvanlamağımızı məsləhət gördülər.

Sonuncu qurumdan isə qeyd etdilər ki, rəsmi şəxslər sahələrdə olduqlarından idarədə suallarımızı cavablandıracaq kimsə yoxdur.

Həftə içi.- 2008.- 8 fevral.- S. 1; 6.