Azərbaycan nümayəndə heyəti neft muzeylərinin təcrübəsini öyrənmək məqsədi ilə ABŞ-da səfərdə olmuşdur

AzərTAc xəbər verir ki, Prezident İlham Əliyevin ölkəmizdə neft salnaməsinin öyrənilməsini və təbliğinin gücləndirilməsini təmin etmək məqsədilə Bakı şəhərində Neft muzeyinin yaradılması haqqında sərəncamından irəli gələn vəzifələrin yerinə yetirilməsi, dünya ölkələrində fəaliyyət göstərən neft muzeylərinin təcrübəsinin öyrənilməsi üçün ARDNŞ-in vitse-prezidenti Xaliq Məmmodovun rəhbərlik etdiyi nümayəndə heyəti ABŞ-da səfərdə olmuşdur.

Azərbaycan Rəssamlıq Akademiyasının prorektoru Cəlil Hüseynov, Mədəniyyət və Turizm Nazirliyinin sektor müdiri Azadə Hüseynova, Muzey Mərkəzinin şöbə müdiri Əminə Məlikova və ARDNŞ-in mütəxəssisi Teymur Mahmudovun daxil olduğu nümayəndə heyətini Vaşinqtonda yerləşən "American Oil and Gas Historical Society"cəmiyyətinin rəhbərliyi səfər boyu müşayiət etmişdir. Səfər çərçivəsində nümayəndə heyəti Texas ştatının Hyuston şəhərindəki Təbii Elmlər Muzeyində, "Veys Enerji Xol" Neft sərgisində, Qalveston şəhərindəki "Ocean Star Offshore Drilling Rig and Museum" adlı üzən qazma qurğusu muzeyində, Beamont şəhərindəki Texas Enerji Muzeyində, "Spindletop Gladys City Museumda olmuş, eksponatlarla tanış olmuşlar. Heyət üzvləri habelə Dailas ştatının Fort Vors şəhərindəki Elm və Tarix Muzeyinə, Təbiət və Elm Muzeyinə, Oklahoma Tarix Elmləri Mərkəzinə, "Devon Enerji" şirkətinin açıq tipli neft və qaz park-muzeyinə baş çəkmiş, buradakı sahə avadanlığı ilə tanış olmuşdur. Oklahoma ştatının Tulza və Bartlesvil şəhərlərindəki Geofiziklər Cəmiyyəti, Geofiziki Elmlər Mərkəzi və "Conoco Phillips Petroleum" şirkətinin muzeyində keçirilmiş görüşlər də yaddaqalan olmuşdur.

Nümayəndə heyəti həmçinin Ponka Sitidə Yeni Konoko və Marland neft muzeyləri ilə, Ehid şəhərində Çeroki Regional Muzeyi ilə, eləcə də açıq havada yerləşən "Ames. Astrobleıne" neft muzeyi ilə də tanış olmuşlar. Görüşlər zamanı amerikalı mütəxəssislər Bakıda Neft muzeyinin yaradılması istiqamətində atılan addımları yüksək qiymətləndirmiş, ABŞ-dakı neft muzeylərinin iş prinsipləri barədə azərbaycanlı təmsilçilərə ətraflı məlumat vermiş, onlara muzeylərin fəaliyyəti ilə tanış olmaq və istisna hal kimi, çəkilişlər aparmaq üçün şərait yaradılmışdır. Bundan əlavə, ABŞ səfəri çərçivəsində bütün dünyada tanınan "Bob Vayz Dizayn İsland" və məşhur "Disneylənd" şəhərciyinin dizayn işlərinin icraçılarından biri olan Meksikanın "Legoretto+Legoretto"şirkətləri ilə əməkdaşlıq imkanları müzakirə olunmuşdur. Bu şirkətlərin rəhbərləri ilə danışıqlar zamanı əsas diqqət ABŞ-da fəaliyyət göstərən muzeylərin təcrübəsinin Bakıda inşa ediləcək Neft Muzeyində tətbiq edilməsinin mümkünlüyünə yönəldilmişdir. Amerikalılar Azərbaycanda yaradılacaq Neft muzeyinin təşkili üçün hər cür kömək göstərməyə hazır olduqlarını bildirmişlər.

Səfər çərçivəsində keçirilən görüşlərdə yerli mütəxəssislərə Azərbaycan haqqında, ölkədə neft sənayesinin tarixi, eləcə də neft muzeyinin yaradılması sahəsində görülən işlər barədə məlumat verilmişdir. Azərbaycan nümayəndə heyəti Hyuston şəhərində fəaliyyət göstərən "Hyuston-Bakı Qardaşlaşmış Şəhərlər" Cəmiyyətində, eləcə də "Raindrop" Türk evi cəmiyyətində keçirilən görüşlərdə iştirak etmiş, ABŞ-ın nüfuzlu universitetlərində təhsillərini davam etdirən ARDNŞ təqaüdçüləri ilə görüşmüşdür. Nümayəndə heyətinin ABŞ-a səfəri, burada aparılan fikir və təcrübə mübadilələri Bakıda Neft muzeyinin yaradılması prosesinə müsbət təsir göstərəcəkdir.

Azərbaycan.- 2008.- 22 fevral.- S. 3.