Mehdiyev M.

Tarixi yadigarları yaşadan ünvan

Respublika Prezidenti cənab İlham Əliyev bu günlərdə Azərbaycan Milli Elmlər Akademiyası Tarix Muzeyinin maddi-texniki bazasının yaxşılaşdırılması haqqında sərəncam imzalamışdır. Sənəddə qeyd olunur ki, muzeydə mühafizə olunan eksponatların restavrasiyası və yenilərinin alınması üçün 2008-ci il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan bir milyon manat məbləğində vəsait ayrılsın. Muzeyin direktoru Nailə Vəlixanlı demişdir:

- Bu binanın əsası ötən əsrin əvvəllərində məşhur xeyriyyəçi Hacı Zeynalabdin Tağıyev tərəfindən qoyulmuş, özü də burada yaşamışdır. Sonralar Tarix Muzeyi kimi tanınmışdır. Doğrudur, qanlı repressiya və İkinci Dünya müharibəsi dövründə onun qapıları bağlanmışdır. Nə qədər çətin olsa da, xalqımızın adına, şərəfinə layiq ünvan kimi yaşamışdır. Lakin muzeyin daha çox tanınması, eksponatlarla zənginləşməsi əsasən ötən əsrin 70-80-ci illərində olmuşdur. Ulu öndər Heydər Əliyevin Tarix Muzeyinə göstərdiyi qayğı heç vaxt unudulmayacaq. Onun dəfələrlə muzeyimizə gəlməsini əks etdirən şəkillər bura gələnlərdə xoş ovqat oyadır. O illərdə dünyanın ən uzaq, ucqar ölkələrindən muzeyə gələnlər olurdu. Milli dəyərlərimizi, tarixi yadigarlarımızı qoruyub saxladığımız üçün bizlərə minnətdarlıq edər, ürək sözlərini rəy kitabına yazardılar.
Bir zaman muzeyə diqqət, qayğı azaldı. Divarlar çat verdi, suvaqlar qopub düşdü. Hətta yersiz, mənasız şayiələr də uydurdular ki, guya muzey ləğv olmaq üzrədir. Əlbəttə, bütün bunlar əsassız idi. Gələcəyə ümidlə, inamla baxırdıq. Nəhayət, arzumuza çatdıq. İki il əvvəl cənab İlham Əliyevin imzaladığı sərəncama əsasən binada əsaslı təmir işlərinə başlandı.
Şükürlər olsun ki, aylarla davam edən təmir yüksək keyfiyyətlə başa çatdı. Vəziyyətlə tanış olmaq üçün dövlətimizin başçısı, möhtərəm Prezident İlham Əliyev muzeyə gəldi. Prezidentin verdiyi tapşırıqlar, məsləhətlər indi də yadımızda qalıb. Yaxın günlərdə isə cənab Prezident xalqımızın tarixi-mədəni irsinin qorunub saxlanılmasında və təbliğində xidmətləri olan muzeyin eksponatlarının restavrasiyası və yenilərin alınması üçün bir milyon manat məbləğində vəsait ayrılması barədə sərəncam imzalayıb. Fürsətdən istifadə edib deyirəm: çox sağ olun, cənab Prezident. Aylar, illər ötüb keçəcək, amma Sizin bu sərəncamınız xalqımızın tarixini yaşadan ünvanda mühafizə edilən 300 mindən artıq sənət nümunəsinin gələcək nəsillərə ərməğan edilməsinə səbəb olacaq.
H.Vəlixanlı daha sonra dedi ki, muzeyin açılış mərasimi mart ayında olacaq. İnanırıq ki, tarixi yadigarların mühafizə olunduğu ünvan bundan sonra da şöhrətini qoruyub saxlayacaqdır.

Azərbaycan.- 2008.- 15 fevral.- S. 1.