Hacızadə A.

Sankt-Peterburqda “Baku” jurnalının təqdimat mərasimi keçirilmişdir

Yeni, nəfis tərtibatlı "Baku" jurnalının Rusiyanın şimal paytaxtında keçirilmiş təqdimat mərasimi mühüm hadisə olmuşdur. Jurnalın baş redaktoru Heydər Əliyev Fondunun Rusiya Federasiyasındakı nümayəndəliyinin rəhbəri Leyla Əliyevadır.
Həm Azərbaycanda, həm də onun hüdudlarından kənarda geniş oxucu auditoriyası üçün nəzərdə tutulmuş bu jurnalın təqdimatının şəhərin mərkəzində yerləşən, Şərq üslubunda tərtib olunmuş gözəl "Baku" restoranında keçirilməsi rəmzi məna daşıyır. Mərasimdə Sankt-Peterburqda akkreditə edilmiş diplomatik missiyaların rəhbərləri, tanınmış mədəniyyət xadimləri və ictimaiyyətin nümayəndələri, şəhərin biznes elitasının, eləcə də Azərbaycan diasporunun təmsilçiləri iştirak edirdi. Musiqi kompozisiyalarının müşayiəti ilə çox səmimi şəraitdə keçmiş mərasimdə çıxış edənlər ölkəmizə, xalqımıza, jurnalın baş redaktoru Leyla Əliyevaya ünvanlanmış təbriklərini və hərarətli sözlərini söylədilər.
"Baku" jurnalının naşiri və baş redaktoru Leyla Əliyeva bu nəşrin konsepsiyası və məqsədləri barədə məlumat verərək dedi: " "Baku" jurnalı geniş auditoriya üçün nəzərdə tutulmuşdur. Biz bu jurnal vasitəsilə şəhərimizin bütün gözəlliklərini və hərarətini oxuculara çatdırmağa çalışmışıq. Bakı deyəndə gözlərimiz önündə mülayim iqlimli, günəşli bir şəhər, onun zəngin mədəniyyəti və qədim tarixi canlanır. Güman edirəm ki, bu jurnal Azərbaycanla Rusiya arasında dostluğun möhkəmlənməsinə, mədəni dialoqun inkişafına kömək edəcəkdir. Ümidvaram ki, xalqların qarşılıqlı sevgisindən, tarixindən və dostluğundan bəhs edən bu jurnalı hamı məmnuniyyətlə oxuyacaqdır". O, xüsusi vurğuladı ki, bu jurnal siyasi nəşr deyil, burada əsasən mədəniyyət, tarix, müxtəlif maraqlı şəxsiyyətlər haqqında söhbət açılır və başlıca vəzifə ondan ibarətdir ki, bu nəşr Azərbaycanı sevən, ölkəmiz haqqında daha çox məlumat əldə etmək istəyən hər kəs üçün maraqlı olsun. "Baku" jurnalının təkcə Azərbaycan üçün nəzərdə tutulmadığını bildirən L.Əliyeva dedi ki, Azərbaycan tolerant dövlətdir, bu ölkədə çoxsaylı millətlərin nümayəndələri yaşayır. Bu jurnal həm də onlar üçün, eləcə də bütün başqa millətlər və xalqlar üçündür. Jurnalın növbəti nömrəsi martın 15-də çapdan çıxacaq və güman edirəm ki, arzu edənlərin hər biri onu əldə edə biləcəkdir. Mən çox istərdim ki, "Baku" jurnalı bütün Rusiyada, gələcəkdə isə bütün MDB məkanında populyar olsun.
Sonra Leyla Əliyeva Azərbaycanın Rusiyadakı səfiri Polad Bülbüloğlunu ad günü münasibətilə təbrik etdi və ona gül dəstəsi təqdim etdi.
Dünya şöhrətli böyük rus müğənnisi, SSRİ xalq artisti, Lenin mükafatı və SSRİ Dövlət mükafatı laureatı Yelena Obraztsova "Baku" jurnalının nəşrini çox mühüm hadisə adlandıraraq onun səhifələrində Sankt-Peterburq barəsində də materiallar dərc edilməsi arzusunu bildirdi ki, bakılılar bu şəhərin mədəniyyəti barədə daha çox məlumat əldə etsinlər. Sankt-Peterburq administrasiyasının mədəniyyət komitəsinin sədri Nikolay Burov öz çıxışında dedi ki, jurnal gözəl tərtib olunmaqla bərabər, məzmunca da zəngindir. İctimai-siyasi, ədəbi-bədii nəşr üçün çox düzgün istiqamət seçilmişdir. Orada hər şey var - bir qədər reklam, çoxlu tarixi məlumat, tanınmış mədəniyyət xadimlərinin gözəl fotoşəkilləri... Jurnalın rus dilində nəşr edilməsi isə çox mühümdür.
Azərbaycanın Sankt-Peterburqdakı baş konsulu Qüdsi Osmanov qonaqlara "Baku" jurnalının layihəsinə göstərdikləri diqqətə və mərasimdə iştirak etmələrinə görə təşəkkürünü bildirərək vurğuladı ki, bu nəşr xalqlarımız arasında bir növ körpü olacaq, ölkəmiz, onun mədəniyyəti və bənzərsiz özəllikləri ilə daha yaxından tanış olmağa imkan verəcəkdir.
Azərbaycanın RF-dəki səfiri Polad Bülbüloğlu səmimi qəbula və Heydər Əliyev Fondunun Rusiyadakı nümayəndəliyinin humanitar layihələrini dəstəklədiyinə görə Sankt-Peterburq qubernatoru Valentina Matviyenkonun şəxsində şəhər rəhbərliyinə təşəkkür etdi.
Səfir Leyla Əliyevaya da minnətdarlığını bildirərək dedi ki, o, iki ölkənin mədəniyyətlərinin yaxınlaşması üçün qısa müddətdə çox iş görmüşdür. Bu gün biz müxtəlif suveren dövlətlərdə yaşayırıq, lakin xalqlarımız arasında böyük dostluq, qarşılıqlı hörmət münasibətləri, Rusiya mədəniyyətinə, Azərbaycanda əvvəlki səviyyədə qorunub saxlanan rus dilinə hörmət hissləri qalmışdır. "Baku" jurnalının rus dilində nəşr edilməsi də bu münasibətin göstəricisidir. Bu jurnal xalqlarımızın, mədəniyyətlərimizin yaxınlaşması üçün hələ çox iş görəcəkdir. Bu, bizim həmişə yanaşı, həmişə bir yerdə olmağımızın rəhnidir.
Sankt-Peterburqdakı Azərbaycan milli-mədəni muxtariyyətinin sədri Vaqif Məmişov vurğuladı ki, Azərbaycan nümayəndə heyətinin Neva sahilindəki şəhərə səfəri və burada "Baku" jurnalının təqdimat mərasiminin keçirilməsi xalqlarımız arasında etimadın daha da möhkəmlənməsinə xidmət edəcək çox böyük hadisədir.
Tarixi abidələrin qorunması üzrə komitənin sədr müavini Olqa Taratınova, Ukraynanın baş konsulu Nikolay Rudko, tatar diasporunun nümayəndəsi Əlfiyyə Raxmatulina, "Yevropa" hotelinin baş direktoru Tomas Noll və başqaları öz çıxışlarında dedilər ki, "Baku" jurnalının təqdimatı Sankt-Peterburqun mədəni həyatında mühüm hadisə kimi mədəni dialoqun inkişafı üçün çox böyük əhəmiyyət kəsb edr. "Baku" jurnalı iki şəhər arasında əlaqələndirici körpü rolu oynayacaq, onun sayəsində iki dost xalq bir-birinə daha da yaxınlaşacaqdır. Arzu edirik ki, bu jurnal vasitəsilə rusiyalılar Azərbaycanı tanısın, azərbaycanlılar isə öz ölkələri ilə Sankt-Peterburq arasında sıx dostluq əlaqələri barədə, bu şəhərin həyatı və mədəniyyəti barədə daha çox informasiya əldə etsinlər.
Mərasimdə qonaqlara "Baku" jurnalının nüsxələri təqdim edildi, eləcə də jurnala abunə yazılmaq üçün vizit vərəqələri arasında "uduş tirajı" keçirildi. "Mebel İspanii" şirkətinin baş direktoru Yevgeni Simonov jurnala pulsuz abunə yazılmaq hüququ qazandı. Təqdimat gecəsində ölkəmizin mədəniyyəti və ənənələri barədə bilik müsabiqəsi də keçirildi, onda fərqlənənlərə hədiyyələr təqdim edildi.
Qonaqlar foyedə rəssamlardan Sənan Ələsgərovun və Vladislav Loktevin Azərbaycana həsr edilmiş işləri ilə tanış oldular.

Azərbaycan.- 2008.- 6 fevral.- S. 5.